د چین د سوداګرۍ وزارت وياند د مارچ په ۳ مه په يوه مطبوعاتي غونډه کې يوځل بيا پر خپلو محصولاتو د امريکا د تعرفو د لس سلنه اضافه کېدنې سره مخالفت څرګند کړی.
امریکا د مارچ په درېیمه د فنټانيل او نورو مسئلو په پلمه اعلان کړی، چې د روانې مياشتې له څلورمې به دغه هېواد ته د چين پر صادرېدونکو محصولاتو تعرفې لس سلنه نورې هم لوړې کړي.
د چين د سوداګرۍ وزارت وياند په خپلو خبرو کې د امريکا له يادې پرېکړې سره ټينګ مخالفت څرګند کړ او په وينا يې، هېواد به يې له خپلو حقونو څخه د دفاع په موخه ځوابي اقدامات غوره کړي.
نوموړي وويل، چين په نړۍ کې د نشه يي توکو ممنوعيت په برخه کې تر ټولو ډېرې جدي تګلارې جوړې او پلې کړې او له امريکا سره يې هم پدې اړه پراخې او ژورې همکارۍ کړې او د ليدو وړ لاسته راوړنې لري.
ده زیاته کړې چې امریکا د چین د یادو ټولو اقداماتو سره سره د فنټانيل په پلمه پر چيني محصولاتو یو ځل بیا تعرفې اضافه کړې.
هغه وايي چې د امریکا دا اقدام پر واقعیتونو سترګې پټول، د یو اړخیزم او بادارۍ کړنو دوام دی.