نورستان کې د ترافیکي پېښې له کبله ۸ کسانو ته مرګ ژوبله اوښتې

د نورستان ولایت ځایي امنیتي مسوولینو خبر ورکړی، چې د دغه ولایت په برګمټال ولسوالۍ کې د یوې ترافیکي پېښې له امله یو کس مړ او ۷ نور ټپیان شوي دي. د مسوولینو په خبره دا پېښه پرون ناوخته د برګمټال ولسوالۍ په «افزوک» سیمه کې را منځته شوې. سرچینې زیاته کړې، چې دا پېښه د یوه لرګین پله د ماتېدو له امله هغه وخت را منځته شوې، چې یو ډاټسن موټر پرې د تېرېدو په حال کې و. سرچینې د ټپیانو د روغتیايي وضعیت په تړاو څه نه دي ویلي خو وایي چې د درملنې په موخه ځایي روغتون ته لېږدول شوي. دا په داسې حال کې چې نورستان کې د خرابو سړکونو او د موټر چلوونکو د بې احتیاطۍ له امله وخت ناوخته ترافیکي پېښې را منځته کېږي چې ډېری مهال مرګ ژوبله هم لري.