د نړۍ هر هېواد او په ټوله کې انساني ټولنه ښه او بد دودونه او رواجونه لري، چې بد یې د وروسته پاتې کېدو او ښه يې د حکمت، پوهې، ژوندي پاته کېدو او غوړېدو لامل ګرځي. وېښ ملتونه بد دودونه پرېږدي او ښه دودونه پالي او ان د اقتصادي پرمختګ سبب يې ګرځوي.
دودونه او رواجونه د بشري ټولنو اړين ارزښتونه او د ټولنو د پایښت او پرمختګ بنسټونه جوړوي، مادي او معنوي ګټې يې ساتي او سمون او پرمختګ ته يې لارې هواروي.
دودونه د ټبرونو او ملتونو هویت او تاریخ ژوندی ساتي او د خلکو مسئولیتونه او حقونه ترې راپورته کېږي.
چينايان ګڼې دوديزې ورځې او د خوښۍ اخترونه لري، خو تر ټولو مهم يې پسرلنی اختر دی، چې په وياړ يې په ټول چين کې یوه اوونۍ رخصت وي. خو په دې ليکنې کې به یې د يوې بلې ورځې (چينګ مينګ) په اړه لږ څه مالومات وړاندې کړم.
چينايانو يو کال د اقليمي توپيرونو له مخې په ۲۴ برجونو يا څلو ويشلی، يو يې د چينګ مينګ څلی دی، چې پر مهال یې خلک د خپلو مړو شويو مشرانو او اتلانو ته درناوی څرګندوي او عموماً د ميلادي کال د اپريل په څلورمې او یا پنځمې نېټې يې مراسم ترسره کېږي. بل دغه ورځ په چين کې د اختر په څېر هم لمانځل کېږي.
چينايان ځانګړي اخترونه لري، خو درې اخترونه ( پسرلنی اختر، دوان وو اختر او د منځني مني اختر) او يوه ځانګړې ورځ (چينګ مينګ) ورته بيا ډېر مهم ارزښت لري.
د روان ميلادي کال د اپريل څلورمه نېټه د چين له چينګ مينګ سره برابره ده، چې په مناسبت يې په ټول هېواد کې يوه ورځ رخصتي وي.
نن په چين کې چينګ مينګ جيۍ (清明节) دی، چې چينګ(清) د پاک، مينګ (明) د روښان او جيۍ (节) د ورځې مانا لري.
خلک پدې ورځ خپلو مړو شوو نيکونو او نياګانو ته درناوی څرګندوي، چې دغه عمل ته بیا په چيني ژبه جي ځو (祭祖) وايي.
چينګ مينګ د چين په ډېرو سیمو کې د مړو شويو مشرانو د ياد ورځې په نوم هم يادېږي، چې پرمهال يې خلک ډول ډول دودونه پالي او ډېر ارزښت ورکوي.
چينايان د چينګ مينګ په درشل کې د خپلو مړو شوو نيکونو، نياګانو، خپلوانو او قربانيانو قبرونو ته ورځي، پاکوي يې، د ګلانو پاڼې پرې پاشي، د صبر ونې ښاخونه پرې ږدي، يادونه يې تازه کوي او دعاګانې ورته کوي.
چينګ مينګ اختر د چين د هان امپراتورۍ یعنې له ميلاد څخه درې پيړۍ مخکې دود موندلی او په څوارلسمې ميلادي پيړۍ کې د شهرت لوړو پوړيو ته رسیدلی دی.
چينايان اوس هم د چينګ مينګ دودونه پالي، خو د مشرانو قبرونو ته ورتګ او نمانځنه يې لږ څه ساده او پراخه شوې ده. دوی به پخوا په خپلو کورونو کې د خپلو مړو شويو مشرانو د دعا او درناوي مراسم ترسره کول، خو اوس د دولت لوړپوړي چارواکي، بېلا بېل سازمانونه او ټولنې د هغو اتلانو او مشهورو څېرو قبرونو ته ورځي، چې د چين د فاع او خدمت په خاطر یې ځانونه قربان کړي دي.
د چينګ مينګ ورځ د تا چينګ په نوم هم يادېږي، چې په پسرلي کې د چکر وهلو مانا ورکوي.
چينګ مينګ اختر معمولاً په پسرلي کې وي، نو چينايان د دغه اختر په ترڅ کې سيلانيزو ځايونو ته ځي، ميلې کوي، دودیزې لوبې ترسره کوي، د طبيعت له منظرو خوندونه اخلي او د پسرلي ښکلې منظرې ننداره کوي، چې دغه عمل ته په چيني ژبه تاچينګ (踏青) يعنې له پسرلنيو منظرو څخه خوند اخيستل وايي.
