د امریکا له خوا ایران ته د سختې بمبارۍ ګواښ، دایران له خوا تر ځمکې لاندې د خپلو موشکي او راکټي ښار ګوټو نندارې ته وړاندې کېل، سیمې ته د امریکا د نویو جنګي الوتکو او بېړیو راوستل، په غزه کې د بشري ناورین دوام، پر یمن د امریکا او انګلیستان هوايي بریدونو او دغه راز په سره بحیره کې د یمن له خوا د امریکايي او اسراییلو بېړیو او تل ابیب په نښه کېدل، د اوکراین او روسيې په جګړه کې د ټرمپ له خوا د خپلو ګټو تعقیبول او په یو اړخیزو تعرفو سره د نړیوالې سوداګرۍ له خطر سره مخ کول هغه څه دي چې عملا يې نړیوال نظم په خطر کې اچولی او د دې اقداماتو په دوام سره آن د نړیوالې ګډوډۍ او جګړې احتمال هم لرې نه ښکاري.
تازه خبرونه دا دي چې امریکا په هند اقیانوس کې دیګوګارسیا جزیره کې خپلې پوځي اډې ته د بمبار سترې او پرمختللې الوتکې «بي ۵۲»، الوتکې وړونکې بېړۍ او الوتکو ته په هوا کې د تیلو ورکولو الوتکې او نور پرمختللي جنګي جازونه ځای پرځای کړي دي.
امریکا دا اقدام په داسې حال کې کوي چې په منځني ختیځ کې د اسراییلو او حماس ترمنځ یوه نا انډوله جګړه روانه ده چې تر اوسه پکې لسګونه زرو کسانو ژوندونه له لاسه ورکړي دي، پر یمن د امریکا او انګلیستان ګډ هوايي بریدونه او پر اسراییلو او سرې بحیرې کې د امریکا او اسراییلو پر بېړیو د یمن د واکمنې ډلې حوثیانو موشکي او راکټي بریدونه ادامه لري.
هېره دې نه وي چې امریکا په دې جګړه کې د اسراییلو تر څنګ ولاړه ده او آن د دغه هېواد ولسمشر ډونالډ ټرمپ خو څه موده مخکې له غزې څخه د فلسطینانو د شړلو او پر دې تړانګه د خیټې اچولو طرحه هم وړاندې کړه چې د عربي هېوادونو له سخت غبرګون سره مخ شوه.
ټرمپ پر دې بسنه نه ده کړې او تازه يې ایران پر درنې او بې سابقې بمبارۍ ګواښلی دی او په مقابل کې يې ایران هم تر ځمکې لاندې خپلو موشکي او پرمختللو وسلو ویډیو ګانې نشر کړې او په یو ډول يې امریکا ته خپل زور ښودلی چې که لاس خطا کړي نو له سخت غبرګون سره به مخ شي.
دا د امریکا اصلي خاصیت دی چې هر هغه هېواد او هر هغه سیمه چې د دوی سیاست او غوښتنې نه مني، نړۍ ته يې یاغي، سرکش او د دوی په اصطلاح له بشري حقونو سرغړونکي او ترهګر معرفي کوي او د دې کار لپاره تبلیغات کوي څو د نړۍ عامو افکارو ته خپل ځان سپين او مقابل لوری تور ثابت کړي.
دوی په دې توګه غواړي چې د نړیوالو په ځانګړې توګه مخ پروده او وروسته پاتې هېوادونو پر اوږو همداسې سپاره پاتې وي، باداري ورباندې وکړي او د هغوی شتمنۍ، بشري قوه او هرڅه باید د امریکا په خدمت کې پاتې شي.
نو هر هېواد چې داسې حد ته نږدې شي چې نور امریکا ته سترګې برګولای او خپل حق ترې غوښتلای شي نو بیا د امریکا له اقتصادي او پوځي ګواښ سره مخ کېږي.
امریکا دا ځل آن له نړۍ سره ډغرې پيل کړې او د ټولې نړۍ پر تولیداتو يې تعرفې لوړې کړې دي.
نتیجه:
په سیمه کې د امریکا نویو نظامي حرکتونو او اقدماتو ته په پام سره، دا خطر ډېر زیات دی چې نړۍ یوه یوې سترې او ورانونکې جګړې سره مخ شي، هغه جګړه چې امریکا يې پیلول غواړي.
دغه هېواد په خپلو غیر نورمالو کړنو سره نړۍ په تېره بیا آسیا له سخت خطر سره مخ کړې او د ټکنالوژۍ په دې عصر کې يې پر داسې خطرناکو عملونو لاس پورې کړی چې په یوه ټس به ټوله سیمه په اور کې وسوځي.
یاغي او سرکش هغه نومونه دي چې امریکا يې خپلو سیالو هېوادونو ته کاروي، خو که حقیقت ته وکتل شي نو امریکا د امریکا په کچه یاغي هېڅوک نشي کېدای.
دا هغه هېواد دی چې د ټولې نړۍ امنیت يې له خطر سره مخ کړی، په منځني ختیځ کې يې اور بل کړی، د غزې تړانګې، کاناډا هېواد، ګرنلنډ جزیره او پاناما کانال په زور او غیر قانوني توګه لاندې کول غواړي او عملا وايي چې دا سیمې باید د امریکا تر کنټرول لاندې شي.
د اوکراین او روسيې جګړې د پای ته رسولو لپاره هم له روسيې او هم له اوکراین څخه حق غواړي او د ټرمپ په وینا که دغه هېوادونه د امریکا غوښتنې ونه مني نو سخت زیان به وکړي.
هغه هېواد دی چې له ټولې نړۍ سره يې عملا تجارتي جګړه پيل کړې.
نو دې ټولو ته په پام سره د نړۍ په تېره بیا د سیمې هېوادونو لپاره لازمه ده چې سره متحد او یو لاس شي او په ګډه د امریکا د زیات غوښتنو مخه ونیسي او اجازه ور نه کړي چې په سیمه کې یو بل اور بل کړي.