د امريکا حکومت په ځايي وخت د اپرېل په ۲مه نېټه پر خپلو ټولو سوداګريزو همکارانو د «متقابلې تعرفې» د لګولو اعلان وکړ. چین سمدلاسه وویل چې د خپلو مشروع حقونو او ګټو د ساتلو لپاره به ځوابي اقدامات وکړي. یوه ورځ وروسته، د چین یو لړ ځوابي اقدامات رامنځته شوي. د بېلګې په توګه، د امریکا له خوا جوړ شویو د وارداتو پر ټولو توکو به ۳۴ سلنه تعرفه زیاته کړي، د سوداګرۍ نړیوال سازمان د شخړو د حل له میکانیزم سره سم به پر امریکا د اړوندو کړنو په اړه دعوه وکړي او د امریکا یو شمېر ادارې د صادراتو د کنټرول په لیست کې به واچوي. کله چې دغه خبر خپور شو، د امریکا د سټاک مارکیټ فیوچر راټیټ شو او د Dow Futures، Nasdaq 100 index Futures او S&P 500 index Futures ټولو بازارونو سپارښتنې سازش له ۳ سلنې څخه ډېر راټیټ شول. د بازار شنونکي اندېښمن دي چې که د امریکا حکومت د تعرفو پالیسي بدله نه کړي، د دغه هېواد اقتصادي وده به په ښکاره توګه ټکنۍ شي.
امریکا ادعا کوي چې په نړیواله سوداګرۍ کې یې زیان خوړلی او د “متقابل عمل” په پلمه یې په چین باندې ۳۴ سلنه “متقابله تعرفه” اعلان کړه. دا د سوداګرۍ نړیوال سازمان له اصولو څخه سرغړونه کوي او د چین مشروع پرمختیایي حقونه زیانمنوي. دا یو اړخیزه ځپنه او کړنه ده. د چين د بهرنيو چارو پوهنتون پروفیسور لي های دونګ وويل، د چين ځوابي تدبيرونه ډېر هدفمند او دقيق دي چې د خپل حاکميت، امنيت او پرمختيايي حقونو د ساتلو اراده څرګندوي او د نړيوالو سوداګريزو اصولو او څو اړخيزو سوداګريزو نظامونو ساتنه کوي. په ورته مهال دا د امریکا لپاره یو خبرداری هم دی چې که په پرله پسې ډول پر نورو هېوادونو د تعرفو په لګولو ټینګار وکړي، نو امریکا به هم د نورو هېوادونو له خوا ورته یا هم شدید غبرګونونه تجربه کړي.
د امریکا د سوداګرۍ وزارت د معلوماتو له مخې، په ۲۰۲۴م کال کې د امریکا سوداګریز منفي توازن ۱،۲۱ ټریلیونو ډالرو ته رسېدلی چې د ۲۰۱۷م کال په پرتله ۵۰ سلنه زیاتوالی ښيي، له ۲۰۱۷م کال وروسته د امریکا د حکومت له خوا د تعرفې نړیوالې جګړې پیل شوې او له ۲۰۱۸م کال څخه تر ۲۰۲۴م کال پورې له امريکا سره د چين مثبت سوداګریز توازن له ۳۲۳،۳۳ میلياردو ډالرو څخه ۳۶۱ میلياردو ډالرو ته لوړ شوی دی. له دې څخه څرګندېږي چې د تعرفې خنډونه د امریکا اندېښنې نشي حلولای. په حقیقت کې دوه اړخیزه ګټوره همکاري د ټولو هېوادونو د خلکو ګډه هیله ده.
په نننۍ نړۍ کې، څو قطبي کېدل او اقتصاد نړیوال کېدل په ژوره توګه وده کوي، بلکې یو اړخیزم او سوداګریزې ساتنې هرکلی نه کېږي. امریکا باید سمدلاسه خپل ناسم اقدامات اصلاح کړي او د نورو هېوادونو د مجبورولو لپاره د وسیلې په توګه د تعرفو لوړولو تګلارې ودروي. د نړۍ بېلا بېل هېوادونه هم باید متحد شي، څو د امریکا له یو اړخیز چلند سره په ګډه مقاومت وکړي او د څو اړخیز سوداګریز سیسټم ساتنه وکړي ځکه د تعرفې او سوداګرۍ په جګړو کې هېڅ ګټونکی نشته.
