بلخ کې راستنېدونکو کډوالو ته استوګنیزې نمرې وېشل شوې

د بلخ ولایت ځایي چاوراکو خبر ورکړی، چې د سرپرست حکومت د اداري مرستیال مولوي عبدالسلام حنفي په مشرۍ د کور او ښار جوړولو وزیر شیخ حمدالله نعماني، د بلخ ولایت په نهرشاهي ولسوالۍ کې راستنېدونکو کډوالو کورنیو ته استوګنیزې نمرې وېشلې دي. په یادو مراسمو کې اداري مرستیال مولوي عبدالسلام حنفي په نورو هېوادونو کې پر مېشتو افغان کډوالو غږ وکړ، چې خپل هېواد ته راستانه شي، نوموړي ویلي، چې ا.ا دوی ته د ژوند کولو باعزته زمینه برابره کړې ده. حنفي زیاته کړې، له بده مرغه چې ګاونډي هېوادونه د ټولو ملي، سیمه ییز او نړیوالو اصولو او قوانینو خلاف له افغان کډوالو سره ناوړه چلند کوي او په ځینو مواردو کې یې شتمني هم لوټي. په ورته وخت کې د کور او ښار جوړولو وزارت وزیر شیخ حمدالله نعماني ویلي، خوښ دی چې د خپلو کډوالو ورونو خدمت کوي او په کورد ننه ورته د دایمي مېشتېدو لپاره زمینه برابروي.