د مایکروسافت بنسټګر او د نړۍ له شتمنو کسانو څخه، بېل ګېټس، تازه اعلان کړی چې په راتلونکو شلو کلونو کې به خپله ټوله شتمني د بشري مرستو لپاره ځانګړې کړي او خپل خیریه بنسټ به تر ۲۰۴۵ کال پورې وتړي. ګېټس ویلي، چې د ده د شتمنۍ اندازه شاوخوا ۲۰۰ میلیارده ډالرو ته رسېږي، چې د خیریه بنسټونو له لارې به د ملاریا او پولیو په څېر وژونکو ناروغیو، د ښځو او ماشومانو د مخنیوي وړ ناروغیو له منځه وړلو، او په ټوله نړۍ کې د فقر د کچې د راټیټولو لپاره ولګول شي. نوموړي ټینګار کړی، چې باور لري دغه پانګه به د انسانانو د ژوند د ښه والي لپاره ګټوره تمامه شي، او د بشري ستونزو په حل کې به مهم رول ولوبوي.
