اقتصادي مرستیالۍ: د ا.ا لوړپوړی پلاوی کازان ښار ته رسېدلی

د سرپرست حکومت اقتصادي مرستیالۍ خبر ورکړی، چې د اقتصادي مرستیال ملا عبدالغني برادر اخوند په مشرۍ د افغانستان ا.ا لوړپوړی پلاوی، په «کازان ۱۶م» نړیوال اقتصادي فورم کې د ګډون په موخه د تاتارستان جمهوریت مرکز کازان ښار ته رسېدلی دی. د اقتصادي مرستیالۍ د مطبوعاتي دفتر د مالوماتو له مخې؛ د کازان په نړیوال هوايي ډګر کې د اقتصادي مرستیال په مشرۍ د ا.ا لوړپوړي پلاوي ته د تاتارستان جمهوریت د رهبر د مرستیال له لوري تود هرکلی شوی دی. ټاکل شوې ده چې د سرپرست حکومت اقتصادي مرستیال په مشرۍ به یاد پلاوی د «کازان ۱۶م» نړیوال اقتصادي فورم په څنډو کې، د یو شمېر هېوادونو له لوړپوړو چارواکو سره رسمي لیدنې هم وکړي.