نړۍ کې د داخلي بې ځایه شویو شمېر له ۸۳ میلیونه کسانو واوښت

د ملګرو ملتونو پراختیایي پروګرام ویلي، چې د تېر میلادي کال تر پایه پورې، په ټوله نړۍ کې شاوخوا ۸۳.۴میلیونه کسان د جګړو، زورزیاتي او طبیعي پېښو له امله په خپلو هېوادونو کې له خپلو مېنو بې ‌ځایه شوي دي. راپور کې راغلي چې کانګو، سوډان، لبنان، اوکراین او افغانستان د هغو هېوادونو په ډله کې دي چې د داخلي بې ځایه شویو شمېر پکې تر بل هر ځایه ډېر دی. په افغانستان کې یوازې د تېر میلادي کال په اوږدو کې شاوخوا « ۱.۳ میلیونه کسان» چې ډېری یې د طبیعي پیښو له امله وو، له خپلو مېنو بې ‌ځایه شوي دي. د ملګرو ملتونو د شمیرو پر بنسټ، د کور دننه بې‌ ځایه شویو کسانو شمېر د تېر کال په پرتله ۱۰ سلنه زیاتوالی ښيي.