د چين د دولت رئيس شي جين پینګ په وروستيو کې په چين کې د ډنمارک د سوداګرۍ ټولنې مسؤل ته په ځوابي پيغام کې دغه ټولنه او پکې شاملې تصدۍ هڅولې چې د چين او ډنمارک او د چين او اروپا ترمنځ د دوستۍ د لا ټينګېدو او د ګډو ګټو پر بنسټ د خپلمنځي همکاريو د لا پياوړتيا لپاره نوي خدمتونه وکړي.
هغه دوی ته په خطاب کې ویلي: له چین سره ستاسو ژوره مينه او د چين پر راتلونکي پرمختګ د ډنمارکي تصديو باور مې احساس کړی او ستاسو خدمتونه ستایم. ده ویلي، چین نه يوازې پخوا او اوس د سوداګرۍ او کاروبار يو ښه ځای دی، بلکې په راتلونکې کې به هم د بهرنيو سوداګرو د پانګونو خوندي او غوره ځای وي.
ښاغلي شي جین پينګ ویلي: زما په اند پر چين باور لرل، پر راتلونکې باور لرلو په معنا دی او هيله لرم چې په چين کې ستاسو ټولنه او ستاسو د ټولنې غړي شرکتونه په دوامداره توګه د چين او ډنمارک او د چين او اروپا ترمنځ د اړيکو د پرمختګ لپاره د پله رول ولوبوي او د ګډو ګټو پر بنسټ د دوه اړخيزو همکاريو د لا پياوړتيا لپاره خدمتونه وکړي.
په وروستيو کې په چين کې د ډنمارک د سوداګرۍ ټولنې مسؤل د دې ټولنې په استازيتوب د چین د دولت رئيس شي جين پینګ ته په لېږل شوي پیغام کې د ډنمارک او چين ترمنځ د سیاسي اړیکو د ۷۵مې کاليزې په مناسبت مبارکي ویلې او له چين سره يې د همکاريو د پیاوړتيا هيله ښودلې ده.
