اروپا د امریکا له خوا ورسره پيل شوې اقتصادي جګړې په مقابل کې د نه تسلیمېدو شعار پورته کړی او ویلي يې دي چې دوی به د امریکا د اضافي تعرفو په ځواب کې په ورته اقدام لاس پوري کړي.
اوس پوښتنه دا ده چې امریکا خو د خپل پيدایښت له وخته تر نن پورې ځان د اروپا تر پلو لاندې پټ کړی و او له هر هېواد سره به يې چې تقابل را پيدا کېدو نو په مختلفو نومونو يې اروپا له ځان سره ملګرې کړې وه چې ښه مثال يې پر روسيې، ایران او ځینو نورو هېوادونو بندیزونه دي چې د امریکا له پرېکړې اروپا هم متابعت کړی دی.
خو نن چې امریکا د تعرفو کوتک د اروپا پر لوري هم را ایستلی او اروپا هم د مقابلې ټټر ډبولی، آیا د دې جګړې په نتیجه کې به امریکا خپل پخوانی دوست «اروپا» له لاسه ور نه کړي؟ او د دغه دوست له لاسه ورکول به د امریکا پر اقتصاد څه اغېزه وکړي؟
د دې ځواب ښايي ډېر پېچلی وي، خو څه چې ښکاره دي هغه دا دي چې امریکا به نه یوازې اروپا اقتصادي ملګرتیا له لاسه ورکړي، بلکې داسې نښې نښانې شته چې اروپا به د امریکا په مقابل کې د چین لوري ته د مرستې لاس اوږد کړي.
چین خو لا مخکې دا شعار دی چې دروزاې يې د هر چا پر مخ پرانیستې نو دې ته په پام سره ډېر ګمان کېږي چې اروپا به د امریکا د تعرفو او اقتصادي فشارونو له امله د خپل دایمي ملګري پر انتخاب له سره غور وکړي او نور به اروپا حاضره نه وي چې امریکا ته امتیاز ورکړي.
ځینو رسنیو هم داسې راپورونه خپاره کړي چې د امریکا د ولسمشر ډونالډ ټرمپ د تعرفو له امله رامنځته شویو ګډوډیو سره اروپا غواړي چې ځان چین ته ور نږدې کړي.
په یادو راپورونو کې دا هم ویل شوي چې د امریکا د تعرفو ناسم سیاست د دې لامل شو چې د امریکا ډېر پخواني دوستان اوس د دوست او دښمن انتخابولو په اړه له سره فکر کولو ته مجبور شوي دي.
دغه هېوادونه د داسې دوستانو په لټه کې دي چې د ټرمپ له خوا ورباندې لګول شویو تعرفو مخه ونیسي او د دوی ګټې خوندي کړای شي.
نو که موږ فکر وکړو په نړۍ کې له امریکا پرته کوم اقتصادي قدرت دی چې د نړۍ نور هېوادونه او په ځانګړې توګه اروپا تکیه ورباندې کولای شي؟ شک نشته چې دغه لومړی انتخابه چین وي او یوازې چین دا وړتیا لري چې د امریکا ځای ډک کړي.
د دې خبرې د ثبوت لپاره دلته څو مثالونو ته لنډه اشاره کوو، لومړی دا چې د چین د بهرنیو چارو وزارت ویاند لین جیان د روان کال د مې په ۶مه په یوه خبري ناسته کې د چین او اروپا پارلمان ترمنځ د تبادلوي محدودیتونو د لغوه کېدو خبر ورکړ او زیاته يې کړه چې دواړو لوریو تصمیم نیولی چې دوه اړخیزه بندیزونه به په همزمان او همه جانبه توګه لغوه کړي.
ده دا هم وویل چې دواړه لوري به پر دې بسنه ونه کړي، بلکې همکارۍ به زیاتې کړي.
څو ورځې مخکې یعنې د مې ۶مه د چین او اروپا د رسمي اړیکو د ټینګېدو ۵۰مه کلیزه وه او په دې ورځ د دواړو لوریو مشرانو ټینګار کړی چې د خلکو د اقتصادي هوساینې لپاره به خپلې همکارۍ زیاتوي.
د چین د دولت رییس شي جین پينګ د اروپايي شورا رییس کوستا او د اروپايي ټولنې د کمېټې مشرې ون دېرلین ته د مبارکۍ په پيغامونو کې ویلي د چین او اروپايي ټولنې ترمنځ سالمې او ثابتې اړیکې نه یوازې د دواړو لوریو بلکې د نړۍ په ګټه دي.
دا چې چین په چټکه توګه شتمن کېدو په حال کې دی او هر کال د نړۍ د بېلا بېلو هېوادونو او ځان د امریکا سوداګر او پانګوال هم د چین بازار ته د داخلېدو او پکې د پانګونې تمایل لري.
بل دا چې د چین د خلکو عمومي اقتصادي وضعیت هم په چټکۍ سره د ښه کېدو په حال کې دی او دوی د نړۍ د مشهورو برنډونو تولیدات اخلي نو اروپايي تصدۍ او برنډونه پوهېږي چې چین د دوی د تولیداتو د خرڅلاو تر ټولو ستر، مهم او ګټور بازار لري او کولای شي چې د امریکا له خوا د دوی پر تولیداتو د وضع شویو تعرفو څخه د نجات لپاره د چین بازار ته مخه کړي.
نو نتیجه دا کېدای شي چې د ټولو مواردو ته په پام سره ډېر ګمان کېږي چې اروپا به چین د خپل نوي اقتصادي ملګري په توګه انتخاب کړي او په دې سره به امریکا منزوي شي او یا به مجبوره وي چې ځان ته نور دوستان پيدا کړي.
