کابل او اسلام آباد په دې وروستيو کې اعلان کړی، چې خپلمنځي ډيپلوماتيکې اړيکې يې د شارژدافیر له کچې څخه د سفیر کچې ته لوړې کړې دي. د چين د بهرنيو چارو وزارت وياند لين جيان د جون په ۴مه نېټه د دغه وزارت په نوبتي خبري ناسته کې ويلي، چې چين د دې خبر هرکلی کوي او هيله لري، چې د پاکستان او افغانستان ترمنځ د اړيکو په ښه والي او پراختيا کې خپل رغنده رول ته دوام ورکړي.
لين جيان زياته کړې، چې د افغانستان او پاکستان ترمنځ د ډيپلوماتيکو اړيکو د کچې لوړوالی د دواړو هېوادونو د متقابل باور او همکارۍ د پياوړتيا لپاره ګټور دی او د دې سيمې د سولې او ثبات د ساتلو په برخه کې د هغوی ګډې هڅې به پياوړې کړي. نوموړي دا کار په تېر مې کې د چين، افغانستان او پاکستان د بهرنيو چارو وزيرانو ترمنځ د غېر رسمي غونډې د لاسته راوړنو د تطبيق مهم او مثبت ګام بللی.
لي جيان ويلي، چې چين هيله لري چې د افغانستان او پاکستان په شمول د سيمې له هېوادونو سره د سيمې د سولې، ثبات او پرمختګ د ساتلو او د ګاونډيو هېوادونو د ګډ برخليک ټولنې د جوړولو لپاره ګډې هڅې وکړي.
