لوی بدلونونه عموماً د نړیوال ځواک او نړیوال نظم له لویو تعدیلاتو سره مله وي، چې په پایله کې یې نړیوالو اړیکو ته نوې بڼه ورکول کېږي. که د نړۍ د پرمختګ تاریخ ته ځغلنده کتنه ولرو، نو همدغه ټکي ته به ورسېږو.
د چین دولت رئیس شي جین پینګ دوه “لوی حالتونه” وړاندې کړي، چې يو يې؛ نړۍ په يوه داسې لوی بدلون کې روانه ده، چې ساری یې په تېرې يوې پېړۍ کې نه دی لیدل شوی او بل یې د چیني ملت د بیارغونې ستراتیژیک عمومي وضعیت دی.
شي جین پینګ ويلي، دا دوه “لوی حالتونه” یو بل سره تړلي دي او په متقابل ډول يو بل هڅوي او په خبره یې، دغه حالتونه د هېواد د حکومتوالۍ ” د پلان جوړونې د بنسټیز کار” د پیل ټکي دي.
د چین دولت رئیس شي جین پینګ د ۲۰۱۷م کال په پای کې په بهرنيو هېوادونو کې د چین سفیرانو ته په وينا کې وویل ” د نړۍ تاریخ ته په کتو، مونږ له يوه داسې لوی بدلون سره مخ یو، چې په تېرې یوې پیړۍ کې يې ساری نه دی لیدل شوی.”
نوموړي د دې بدلون د اصلي چوکاټ او ژور مفهوم د تشریح په پار ۳ “بې ساري” کليمې کارولې دي.
۱. د پرمختيايي هېوادونو بازارونه او د ودې سرعت یې په بې ساري ډول ګړندی شوی دی. د سراسري جنوب هېوادونو د عمومي ودې څپه ۳ لویې ځانګړتیاوې لري:
الف. د نړيوال اقتصاد په عمومي اندازې کې د سراسري جنوب هېوادونو ونډه ۴۰ سلنې ته پورته شوې، چې په ۲۰۰۰م کال کې يې ۲۰٪ وه.
ب. د دغو هېوادونو د بشپړ صنعتي ځنځیر سیسټم جوړ شوی دی.
ج. د پرمختللو او پرمختيايي هېوادونو د اقتصادي حالاتو ترمنځ لوی بدلونونه رامنځته شوي دي.
۲. د ساینس او ټېکنالوژۍ انقلاب او صنعتي بدلون په نوي پړاو کې دی او ورسره سیالي سخته او بې ساري ده.
د ساینس او ټېکنالوژۍ هر لوی پرمختګ په تولیدي چارو کې ژور بدلونونه رامنځته کوي او ورپسې په نړۍ او نړیوال نظم کې بدلونونه راولي.
۳. د نړۍ د حکومتوالۍ په سیسټم او نړیوال وضعیت کې بې ساري بدلونونه، ناانډولي او نابرابري لیدل کېږي.
چین د سترو نړیوالو بدلونونو پر وړاندې د خپل حکمت او پوهې پر مټ ځوابي تدبیرونه نیولي، چې د بېلګې په توګه به یې دلته څو ته اشاره ولرو. چين له ۱۵۰ څخه ډېرو هېوادونو او له ۳۰ زیاتو نړیوالو سازمانونو سره د کمربند او لارې د ګډې ابادۍ تړونونه لاسلیک کړي دي او د انسانانو د ګډ برخلیک ټولنې مفکوره يې وړاندیز کړې، چې څو ځلې د ملګرو ملتونو په شمول د نړیوالو سازمانونو په سندونو کې لیکل شوې ده.
چین د نړیوالو اړیکو د نوې بڼې جوړونکی دی.
د چین ستر پرمختګ نړۍ په شخړو او جګړو کې نه ده ښکېله کړې، بلکې د تمدن نوې بڼه يې ورکړې ده.
د نړیوالو بدلونونو پر وړاندې د چين هڅې نړۍ ته الهام ورکوي: نړۍ د تاريخ پای ته اړتیا نه، بلکې د مختلفو تمدنونو نوي فصل ته اړتیا لري.