څو چې ټرمپ د امریکا ولسمشر شوی نو په خپلو عجیبو او نادودو پرېکړو يې په نړیوال تجارت کې کړکېچونه رامنځته کړي او نه یوازې تجاران، بلکې هېوادونه يې سرګردانه کړي ځکه یوه ورځ یوه پرېکړه وکړي، سبا يې بېرته ماته کړي او بله ورځ بله پرېکړه وکړي، یوه ورځ له یوه هېواد سره د تعرفو د نرمولو یا لغوه کولو توافق وکړي او بله يې بېرته نقض کړي.
دغه لوبه يې له اروپا سره هم روانه کړې او په دې وروستیو کې د دواړو لوریو لوړپوړو مقاماتو د امریکا او اروپا توافقات سخت بللي او آن اروپايي کمیسیون کمیشنر خو دومره نهیلی شوی چې د مې په ۲۸مه يې په یوه ټیټ کې ویلي و چې امریکا په هېڅ نه راضي کېږي.
د امریکا سپينې ماڼۍ د اقتصادي شورا مدیر کوین هست هم د مې په ۲۹مه اعلان وکړ چې له اروپايي ټولنې سره د امریکا تجارتي خبرې له بندون سره مخ شوې او ادعا يې کړې چې د اروپايي ټولنې غړي هېوادونه د لومړیتوبونو د معلومولو په اړه په پرېکړو کې ناتوانه شوي دي.
د اقتصادي همکارۍ او پرمختیا سازمان یا DECD (دغه سازمان په ۱۹۶۱ میلادي کال تاسیس شوی او ۳۵ هېوادونه پکې غړیتوب لري) په یوه تازه پیشبيني کې ویلي چې روان کال د تعرفو له امله د امریکا ناخالص داخلي تولید اغېزمن شوی دی.
دې سازمان دغه راز پیشبيني کړې چې د امریکا د تعرفو له امله روان کال د نړۍوال اقتصاد وده هم سوکه شوې ده.
له دې دوې ورځې وړاندې ولسمشر ډونالډټرمپ ګواښ کړی و چې که د جون تر لومړۍ نېټې له اروپا سره موافقې ته ونه رسېږي نو د دغه اتحاديې پر وارداتي محصولاتو به تر ۵۰ سلنې تعرفې لوړې کړي.
ټرمپ د مې د وروستۍ جمعې په ورځ په خپله ټولنیزه پاڼه ولیکل: «اروپايي ټولنه چې اصلا د تجارت په برخه کې له متحده ایالاتو څخه د ناسمې استفادې لپاره جوړه شوې ده، ډېره سختګیره او د خبرو نه وړ ګرځېدلې ده.»
په داسې حال کې چې اروپايي ټولنې هم ګواښ کړی چې که له امریکا سره توافق ته ونه رسېږي نو د ۱۰۷ میلیارډ ډالرو په ارزښت تعرفې به اعمال کړي.
د اروپا کمیسیون د سوداګرۍ، اقتصاد او امنیتي چارو کمیشنر ماروش شیفچویچ د جون په څلورمه په پاریس کې ویلي چې امریکايي لوري ته دا خبره بیان شوې چې له اروپا سره يې اقتصادي ټکر او د تعرفو لوړېدل نه د امریکا په ګټه دی او نه د اروپا.
ده ادعا کړې چې د امریکا- اروپا تجارت د نړیوال تجارت ۳۰ سلنه جوړوي نو په خبره يې که دغه تجارت کړکېچن کېږي، زیان يې نړیوال تجارت ته حتمي دی.
د ټرمپ په پېچلې پالیسۍ کې دوست او دښمن هم نه پېژندل کېږي، ځکه هرې خواته د تعرفې ګوزارونه کوي.
د مې په ۱۲مه د چین او امریکا رسمي سرچینو اعلان وکړ چې د دواړو لوریو استازو په جنوا کې موافقه وکړه چې تعرفې به لغوه کوي.
په جنوا کې د امریکا او چین اقتصادي او تجارتي استازو په ګډه بیانیه کې ویلي و چې دواړه لوري د متقابلو ګټو او مساواتو ولاړو مشورو پر بنسټ ګټورو توافقاتو ته رسېدلي دي.
چین ویلي چې د مې په ۱۲مه د دواړو لوریو له ګډې بیانیې وروسته يې پر امریکا د متقابلې تعرفې یا لغوه کړې او یا يې ځنډولې دي.
خو د امریکا ولسمشر ډونالډټرمپ د مې په وروستۍ جمعه په یوه ټویټ کې د جزئیاتو له وړاندې کولو پرته چین د جنوا موافقې پر نقض تورن کړی دی.
د چین د تجارت وزارت بیا د یوې بیانیې په خپرولو سره ویلي چې واشنګټن د جنوا له خبرو سره سره د چین پر ضد تبعیضي اقدامات او محدودیتونه وضع او اجرا کړي دي.
دغه وزارت ویلي چې امریکا د چیني محصلینو وېزې لغوه کړې، چيپونو او مصنوعي ځيرکتیا اړوند شیانو پر لېږلو يې بندیز لګولی دی.
د چین د بهرنیو چارو وزارت هم اعلان کړی چې دغه هېواد د نړیوال صنعت ځنځير ثبات ساتلو ته ژمن دی او چمتو دی چې له ذیربطو هېوادونو او سیمو سره د صادراتو د کنټرول په برخه کې خبرې او همکارۍ پياوړې کړي.
له دې دریځونو داسې ښکاري چې واشنګټن به یو نوی درد سر جوړ کړي، هغه دا چې نه یوازې د اروپايي ټولنې یا چین، بلکې ټولنې نړۍ پر اقتصاد به ګوزارونه وکړي.
د دې ټولو خبرو خلاصه داسې کولای شوو چې تجارتي او اقتصادي جګړې د هېچا په ګټه نه دي، په ځانګړې توګه يې ډېر زیان مشتریانو او عامو خلکو ته رسېږي ځکه هر ډول تجارتي ستونزې او جګړې د شیانو پر بیو مستقیمې اغیزې کوي او ویلای شو چې دا دریځونه به نړیوال تجارت په یوه خطرناک توپان کې ښکیل کړي چې جبرانول به يې ښايي لسګونه کاله وخت ونیسي.
