ټرمپ: ښايي د ټېسلا موټر له سپينۍ ماڼۍ نه لرې کړم

د امریکا ولسمشر ډونالډ ټرمپ ویلي، چې ښايي د ټېسلا موټر له سپينۍ ماڼۍ نه لرې کړم، خو د سټارلېنک خدمتونه به دوام ولري. نوموړي دا څرګندونې داسې مهال کړې، چې د سټارلېنک او ټېسلا شرکتونو د مشر اېلان ماسک او ټرمپ ترمنځ اړیکې پیکه شوې دي . ټرمپ ویلي، چې ښايي خپل ټېسلا موټر له سپینې ماڼۍ نه وباسي، خو د سټارلېنک په اړه داسې کومه پرېکړه نه‌لري او دا یې د یاد شرکت «یو ښه خدمت» بللی دی. د امریکا ولسمشر تر دې مخکې ویلي و، چې له اېلان ماسک نه‌ یې د ټېسلا «اېس» موټر اخیستی، خو داسې ویل کېدل چې د دوی تر منځ د وروستیو اختلافاتو له امله ښايي هغه دا موټر پرېږدي. ټرمپ په دې وروستیو کې ویلي، چې نه غواړي له ماسک سره خپلې اړیکې بېرته جوړې کړي، خو که ماسک ورته زنګ وکړي، ستونزه نه شته.