ټرمپ د امريکا د ختيځ زون پر وخت د جون د ۲۳مې نېټې د مازدېګر په شپږو بجو پر ټولنيزو رسنيو ويلي، چې د اسرائيل او ايران ترمنځ اوربند به تر شاوخوا شپږو ساعتونو وروسته نافذ شي او تر اوربند يوه ورځ وروسته به د دواړو خواوو ترمنځ ۱۲ورځنۍ شخړه رسماً پای ته ورسېږي.
ټرمپ د جون د ۲۴مې نېټې په سهار وختي يو ځل بيا پر ټولنیزو رسنيو خبر ورکړ، چې د اسرائيل او ایران ترمنځ اوربند نافذ شوی او ښکيلې خواوې باید له اوربند څخه سرغړونې ونه کړي.
د اسرائيل صدراعظم بنجېمين نتانياهو په همدې ورځ رسنيو ته ويلي، چې د ډونالډ ټرمپ په غوښتنه یې له ایران سره اوربند منلی دی.
ايراني رسنيو هم د جون په ۲۴مې نېټې خبر ورکړی، چې هېواد يې پر اسرائيل تر څو پړاويزو بريدونو وروسته اوربند منلی دی.
اسرائيل او ايران د اوربند له اعلان وروسته د برياوو اعلانونه کړي دي.
نیتانياهو رسنيو ته ويلي، چې هېواد يې ټولې جنګې موخې ترلاسه کړي او اوس یې له ايران سره اوربند کړی دی.
د ايران د ملي امنيت عالي شورا ويلي، اسرائيل يې اړ کړی چې يو اړخيز تېری پرې پای ته ورسوي او هم یې د بريا اعلان کړی دی.
دواړو خواوو جګړه درولې او اوربند یې کړی، خو سختو کليمو او لفظي بريدونو ته یې دوام ورکړی دی.
د اسرائيل دفاع وزير اسرايل کاتز د جون په ۲۴مې نېټې ايران د اوربند په ماتولو تورن کړی او ويلي يې دي، چې له اوربند وروسته یې هم پر اسرائيل توغندي ویشتلي دي. نوموړي ويلي، هېواد به یې د ايران د سرغړونو په غبرګون کې چټک ګامونه پورته کړي.
د ايران د وسله والو ځواکونو د لوی درستيز رياست د اسرائيل ياد تورونه رد کړي دي.
د ايران د ملي امنيت عالي شورا بیا خبرداری ورکړی، چې د اسرائيل د هر ډول تېري پر وړاندې به غوڅ ګامونه پورته کړي.
د اسرائيل او ايران ترمنځ اوربند شوی، خو لوړ پوړي چارواکي او حکومتونو يې يو پر بل لفظي بريدونه او تورونه لګوي.
تسنيم خبري اژانس د جون په ۲۴مې نېټې د ايران د سپاه پاسداران په قول ويلي، اسرائيلي ځواکونو په درېیو پړاوونو کې د دغه هېواد پر پوځي مرکزونو بريدونه کړي، چې د همدې نېټې د سهار تر نهو بجو پورې يې دوام درلود.
د ایران سپاه پاسداران ځواکونو په يوې اعلاميې کې ويلي، که اسرائيل بیا پر ایران تیری وکړي، نو لویه بیه به یې پرې کړي.
اسرائيل ټايمز هم په همدې ورځ د اسرائيلي چارواکو په قول خبر ورکړی، چې هوايي ځواکونو يې د ايران د دوو توغنديزو بريدونو په غبرګون کې د دغه هېواد د پلازمېنې تهران په شمال کې د رادار پر يوه مرکز بريد کړی دی.
خبر وايي، ټرمپ له نيتانياهو سره په ټليفوني خبرو کې موافقې ته رسېدلی و، چې له اوربند څخه د سرغړونې په بدل کې پر ايران سمبوليک برید وکړي.
ټرمپ د اسرائيل او ایران ترمنځ د اوربند په لومړۍ ورځ پر دواړو خواوو سختې نېوکې وکړې او له اوربند څخه په سرغړونو يې تورن کړل.
ټرمپ ويلي، ايران اټومي وړتيا له لاسه ورکړې او اسرائيل باید سړه سینه وساتي.
د امريکا خبري رسنيو ويلي، چې ډونالډ ټرمپ په همدې ورځ نيتانیاهو ته څرګند پيغام ورکړی، چې پر ايران بیا بريدونه ونه کړي. خو نيتانياهو يې په ځواب کې ويلي، که ایران له اوربنده سرغړونه وکړي، نو بريدونه به پرې وکړي.
ټرمپ په همدې ورځ پر ټولنيزو رسنيو اسرائيل ته خبرداری ورکړی، چې پر ايران بريدونه پای ته ورسوي او دغه هېواد يې له اوربنده پر سرغړونې هم تورن کړی دی.