د برېتانيا فاينېنشل ټايمز ورځپاڼې په دې وروستيو کې ويلي، چې چين په ميليونو ډرونونه توليدوي او د کار د څرنګوالي لارې چارې یې لټوي. ډېری لوېدیځې رسنۍ په دې اند دي، چې ډرونونه يوازې په پوځي برخو کې کارول کيږي.
فاينېنشل ټايمز دا هم ويلي، چې د نړۍ څه باندې اويا سلنه ډرونونه په چين کې توليديږي او د ټکنالوژۍ په برخه کې يې د دغه هېواد د عمده مقام په اړه اندېښنې راپورته کړې دي.
فاينېنشل ټايمز تېر کال هم په يوې مقالې کې ويلي وو، چې د چين د ډرون لوی توليدي شرکت (DJ) پوځي مديريت مخته وړي او د شاهدۍ لپاره یې د انټرنېټ يو عکس هم خپور کړی و.
په دغه عکس کې ښکاري، چې د ډي جۍ (DJ) شرکت د اجرائيوي مديرانو يوې ډلې د ځمکنيو افسرانو ښوونځي د دروازې پر وړاندې يو ډله ييز عکس اخيستی دی.
فاينېنشل ټايمز د دغه عکس په اړه مالومات نه درلودل او بې له څېړنې او پلټنې يې خپور کړی و.
که دغې ورځپاڼې د ياد عکس په اړه پلټنې کړې وای، نو ورته مالومه شوې به وه، چې دغه ښوونځی د ګرځندويانو لپاره يو مشهور ځای دی.
ډرونونه په عمده توګه په کومو وختونو کې ډېر کارول کېږي؟
حقيقت دا دی، د چين ډرونونه د امنيت ساتنې او د مالونو د لېږد رالېږد لپاره په پراخه کچه استعمالېږي او په دې ورستيو کې په ګوي جو ولايت کې سيلاب ځپلو وګړو ته د مرستو د رسولو لپاره هم کارول شوي دي.
ډرونونه په شپه کې نه يوازې د رڼا لپاره کارول کېږي، بلکې د ژغورنې چارو کې هم ترې کار اخيستل کېږي.
تېره اوونۍ د چين د ګوانګ شي د جوانګ قوم د کورواکۍ سيمې په ليو جو ښار کې د سختو بارانونو له امله زورور سيلابونه راووتل او ګڼو خلکو ته يې زيانونه ورسول. د همدې سیمې يو کس د سيلاب په منځ کې بند پاتې و او ژغورونکې ډلې هغه په ډېرې چټکۍ د ډرون په وسيله وژغوره.
د چين د شن جن ښار اوروژونکو په هغې ودانې کې، چې څه موده مخکې ونړېده، د ډرونونو په وسيله د اور وژنې تمرينونه ترسره کړل.
د رسټورانټونو کارکوونکي د چين د لوی دېوال لوړو سیمو ته د ډرونونو په وسيله خواړه لېږدوي.
د شينجيانګ د پنبې بزګران کروندو ته د کيمياوي توکو او درملو د ورکولو لپاره ډرونونه کاروي او سربېره پردې د چين د ګوي جو ولايت د غرنيزو سيمو د زېربنايي پروژو د ساختماني توکو د ليږدولو لپاره هم ډرونونه کارول کېږي.
د چين په بېلا بېلو منظره لرونکو ځایونو کې د زرګونو ډرونونو نندارې ترسره کېږي او وېډيوګانې يې پر ټولنيزو رسنيو خپرېږي، چې نه يوازې د نړۍ د عامو خلکو، بلکې د امريکا د ميليونر ايلن ماسک په څېر د مشهورو څېرو پاملرنه يې هم راجلب کړې ده.
کوچني ډرونونه د کورنیو غړو د سفرونو کې د عکسونو او وېډيوګانو د اخيستلو لپاره کارول کېږي او دا په حقيقت کې د چينايي سيلانيانو لپاره يوه عادي چاره ده.
د چين په ځينو منظره لرونکو ځايونو کې سيلانيان هم کولی شي، چې ډرونونه په کرایه واخلي.
که تاريخ ته يوه ځغلنده کتنه ولرو، نو پوی به شو، چې بارود په لومړي ځل په چين کې جوړ شوي دي.
حقیقت دا دی، چې چين بارود د اور لوبو لپاره کارولي، خو لويديځو هېوادونو بیا د وسلو د جوړولو لپاره کارولي دي. اوس چين د خلکو د ژوند د ښه والي لپاره ميليونونه ډرونونه تولید کړي، خو غربي رسنۍ بیا دا يو ډول وسلې او ګواښ بولي.