یو این ایچ سي ار؛ له پاکستانه د لنډمهاله کارت لرونکو کډوالو پر ایستلو اندېښنه ښودلې

د کډوالو په چارو کې د ملګرو ملتونو عالي کمېشنرۍ (یو این ایچ سي ار) پر خپله اېکس پاڼه په یوه لیکلي بیان کې د پاکستان له هغې پرېکړې اندېښنه ښودلې چې پر بنسټ به یې له دغه هېواده د لنډمهاله استوګنې کارت لرونکي افغان کډوال وایستل شي. یاد سازمان د پاکستان له حکومته غوښتي، هغه افغانان چې نړیوال ملاتړ ته اړتیا لري، ونه باسي. ملګرو ملتونو ټینګار کړی چې پاکستان دې هغه محصلان یا هغوی چې روغتیايي ستونزې لري له ایستلو معاف کړي. سربېره پر دې، یاد بنسټ د ایستلو لپاره د یوې میاشتې ضرب الاجل له ټاکلو هرکلی کړی دی. د کډوالو په چارو کې د ملګرو ملتونو عالي کمېشنرۍ په بیان کې دغه راز راغلي چې افغانستان ته د مېرمنو او نجونو په ایستلو به هغوی د خپلو بنسټيزو حقونو له سرغړونې سره مخ شي.