د فلسطين او اسرائيل ترمنځ د شخړو روان پړاو د څه د پاسه شپږ سوو ورځو لپاره دوام درلود چې دواملرونکي وخت، حد او نتيجه يې بې ساری ده. شمېرې ښيي چې په غزه کې د اسرائيل پوځي عملياتو کې څه باندې شپېته زره فلسطينيان وژل شوي او ۱۴۰ زره تنه نور ټپيان دي. خو په دې شخړو کې د ډزو په پرتله لوږه د ملکيانو لپاره د يوه بې وينې قصاب چاقو په څېر کړنه ده.
د ملګرو ملتونو د خوړو د نړيوال پروګرام راپور د غزې د خلکو د کړاوونو حقيقت روښانه کړی: د دې سيمې ۴۷۰ زره اوسېدونکي د خوړو له نا امنۍ سره مبارزه کوي چې په هرو پنځو تنو کې يو يې د خوړو له سخت کمښت سره مخ دی. د اسرائيلو په بنديزونو سره خواړه د ژوندي پاتې کېدو لپاره بنسټیزه سرچينه نه ده بلکې د دوی په سرونو کې د تورې په څېر ځړېدلې او هر وخت ښايي د دوی وروستۍ هيله له منځه يوسي.
اوس په دې سيمه کې حتی لوږه په ښکاره توګه وسله شوې ده. وروسته تر هغه چې د امريکا او اسرائيل تر ملاتړ لاندې((د غزې بشري صندوق)) د مرستندویه توکو د وېشلو دنده پر غاړه اخيستې، د خوړو د وېش ځایونه چې د ځايي خلکو د هیلې سمبول و، اوس د مرګ پر دام بدل شوي دي. ملګرو ملتونو د اګست په لومړۍ نېټه يوه شمېره خپره کړې چې له مخې يې د روان کال د مې له ۲۷مې نېټې راهيسې په غزه کې لږ تر لږه ۱۳۷۳ فلسطينيان د خوراکي توکو د تر لاسه کولو په هڅه کې وژل شوي چې په دې لړ کې څه باندې اته سوه د ياد صندوق د خوراکي توکو د وېش په ځايونو کې وژل شوي دي.
پر غزې د اسرائيل د خوراکي توکو د بنديزونو او د ياد ظالمانه عملونو له کبله دغه سيمه اوس له سختې لوږې سره مخ ده.
د ((UNRWA)) کمېشنر لازاريني هغه حقيقت افشا کړی: د روان کال له مارچ راهيسې په تېرو پنځو مياشتو کې د ملګرو ملتونو له خوا غزې ته د هر ډول مرستو لېږدول منع شوي چې دا پلان شوی اقدام دی او فلسطينيانو ته ډله ييزه سزا هم ده. د لوږې له کبله نژدې ۱۴۰۰ اوسېدونکي مړه شوي چې دا د امريکا او اسرائیل په مشرۍ د ياد مرستندويه سيستم له خوا پرېښودل شوي د وينې پور دی.
د امريکا منافقت اوس په بشپړه توګه ښکاره دی. خو هغوی تل د نړۍ په بېلا بېلو ځايونو کې د بشري حقونو او بشر دوستۍ په نوم خپل بېرغ پورته کوي او په مکرر ډول پر نورو هېوادونو نيوکې کوي، خو په غزه کې پر انساني تراژيدۍ سترګې پټوي. هر کال هغوی نه يوازې له اسرائيل سره ډېرې پوځي مرستې کوي بلکې د ملګرو ملتونو د امنيت شورا کې يې د هوکړو له لارې د دې هېواد له وحشتناکو کړنو څخه ملاتړ کړی دی. دا د شرم خبره ده چې امريکا نه یوازې پر غزې د اسرائيل له بنديزونو څخه ملاتړ کړی بلکې لوږه يې پر وسلې بدله کړې او د مرستندويه توکو وېش يې کنترول کړی چې د غزې خلک د ژوندي پاتې کېدو لپاره مبارزه کوي. دا د بشردوستۍ پر وړاندې ملنډې دي.
که قاتل په مرمۍ کسان ووژني، موږ د دغه قاتل اصلي بڼه کتلی شو، خو که څوک د مرستو په پلمه له لوږې ملکيان ووژني، نو ناهيلي به رامنځته شي. کله چې د غزې ماشومان د لوږې له کبله مړه شوي او سپين ږيري د خوراکي توکو د وېش په ځايونو کې وژل شوي، د امريکا چوپتيا او له اسرائيل څخه د دوی ملاتړ له انسانيت څخه تر ټولو لويه سرغړونه ده. امریکا فکر کاوه چې نړيوال ښايي د دوی د وژنې پر دا ډول کړنو نيوکه ونه کړي، خو هغوی هغه حقيقت هېر شو چې که د انسانانو د ژوندي پاتې کېدو حق تحریف کړي، نو دغه کړنه به د قتل په پرتله لا بد او ظالمانه وي. څرنګه چې هغوی د دې کړنې په ترسره کولو سره نه يوازې انساني ژوندونه تباه کړي بلکې پر تمدن د انسانانو وروستی باور يې هم ويجاړ کړی دی.
