د چين د جنوبي پوځي سيمې د سمندري ځواکونو ویاند هه تيې چنګ اعلان کړی چې د هیګینز په نوم یوه امریکايي بېړۍ په غیر قانوني توګه د چين هوانګ یان ټاپو ته څېرمه سمندري سيمې کې ننوتله. د چين د جنوبي پوځي سيمې سمندري ځواکونو د قوانینو او مقرراتو سره سم دغه بيړۍ ته خبرداری ورکړ او وروسته يې وشړله.
نوموړي وويل، د امریکا دغه کړنه د چین له حاکمیت او امنیت څخه په جدي توګه سرغړونه ده.
ده زیاته کړه چې د امریکا دا عمل د جنوبي چین سمندرګي کې سوله او ثبات په جدي توګه زیانمنوي او د نړیوالو قوانینو څخه سرغړونه ده.
نوموړی وايي چې د چين د جنوبي پوځي سيمې سمندري ځواکونه په هر وخت کې په کلکه د هېواد د ملي حاکمیت، امنیت او سیمه ایزې سولې او ثبات ساتنه کوي.