اروپایي ټولنې په افغانستان کې د اوبو کمښت یوه جدي اندېښنه بللې

د اوبو نړۍوالې اوونۍ له پای ته رسېدو سره سم، اروپايي ټولنې افغانستان او په ځانګړې توګه په پلازمینه کابل کې د اوبو کمښت یوه جدي اندېښنه بللې ده. یادې ټولنې ویلي، چې د اوبو کمښت د خوړو پر خوندیتوب او عامې روغتیا مستقیمه اغېزه لري. یادې ټولنې ټینګار کړی، چې د اوبو سرچینو سم مدیریت د ټولو ګډ مسوولیت دی او باید هڅه وشي چې اوبه په سمه توګه استفاده او د راتلونکو انسانانو لپاره یو دوامداره راتلونکی جوړ شي. څه موده وړاندې ملګرو ملتونو خبرداری ورکړی و، چې تر ۲۰۳۰کاله پورې ښايي د ښار ځمکنۍ اوبه بشپړې وچې شي او له دې سره به کابل د نړۍ لومړنی عصري ښار وګرځي چې له اوبو بې‌برخې کېږي.