تر خونړیو جګړو وروسته؛ اذربایجان او ارمانیا د روسیې په منځګړتوب اوربند وکړ

اذربایجان او ارمنستان تر څو ورځنۍ جګړې وروسته د روسیې په منځګړیتوب اوربند کړی دی. د روسیې د بهرنیو چارو وزیر سرګي لاوروف په خپلو تازه څرګندونو کې ویلي دي چې د روسیې، اذربایجان او ارمانیا د بهرنیو چارو د وزیرانو ترمنځ پوره لس ساعته خبرې شوې دي او پایله کې یې د اوربند پر رامنځ ته کېدو توافق شوی دی. سرګي لاوروف وایي دواړو لورو ویلي چې د اوربند په موده کې به دواړه هېوادونه د جسدونو د وړلو اجازه ورکوي او د سره صلیب نړیواله کمېټه به بشري مرستې رسوي. ددې تر څنګ ژمنه شوې چې دواړه لوري به د ناګورنو قرباغ د سیمې پر سر مذاکرات پیلوي او هڅه به کوي چې ستونزې د خبرو له لارې حل کړل شي. د ارمانیا او اذربایجان په څو ورځنۍ مخامخ جګړه کې لسګونه کسان وژل شوي دي او اوس اوربند ته تیار شوي. اذربایجان او ارمانیا داسې مهال د منځګړو په هڅو اوربند کوي، چې په دوحه کې افغان لوري د اونیو په تېرېدو لا هم د مذاکراتو پر کړنلاره توافق ته نه دي رسېدلي او نه یې هم چا تر منځ د منځنګړیتوب هڅه کړې ده.