چين؛ د رئيس شي جين پينګ تر مشرۍ لاندې له ناول کرونا ویروس سره د مبارزې لپاره ډېرې ښې او اغېزناکې لارې موندلې دي او ښه مبارزه یې ور سره کړې ده. خو تر څنګ یې اوس نیږدې په ټوله نړۍ کې په چټکۍ سره ددغه ويروس خپرېدل د خواشینۍ وړ دي. په ډېری هېوادونو کې په کرونا ویروس د اخته شویو کسانو شمېر په پر له پسې ډول زياتېږي، چې تر څنګ یې په افغانستان کې هم ددغه ساري ناروغۍ ځينې مثبتې پېښې ثبت شوې دي. دا د انسانانو پر وړاندې یوه ګډه ننګونه بلل کېږي. د نړیوال کېدو په اوسني دور کې د بېلابېلو هېوادونو برخليکونه له يو او بل سره نښلول کېږي، نو د انسانانو د ګډ برخليک ټولنې، ګډه ابادي د انساني ټولنې د پرمختګ او پراختيا يوازنۍ سمه لاره ده.
د ناول کرونا ويروس پر ضد د چين بريالۍ تجربې ډېرې وستایل شوې. د چين د دولت رئيس «شي جين پينګ» ددغه ويروس پر ضد بې ساري ولسي مبارزې خپله څارله او مابریزینو ته یې لارښوونې کولې. د نوموړي تر قوي مشرۍ لاندې به ډېر ژره په ټول چین کې دغه ویروس مخه ونیول شي او د مخنيوي او کنټرول واحد ميکانيزم یې جوړ شوی دی. د روغتيا نړيوال سازمان د عمومي مدير عالي سلاکار دوکتور بروس ايرود څرګنده کړې چې د چين تدبيرونو پر دغه ويروس د زرګونه کسانو د اخته کېدو مخنيوی کړی دی. ددغه نړيوال سازمان د ځينو کارپوهانو لخوا د برابرو شويو شمېرو له مخې، د چين په هڅو سره له دغه هېواد بهر د يادې ساري ناروغۍ چټک خپرېدل له ۲ تر ۳ اوونيو پورې ورو شوي دي ، له دې ښکاري چې د چين حکومت نه يوازې د چينايانو د ژوند او روغتيا د ساتلو لپاره خپلې دندې تر سره کړې دي، بلکې د نړيوالې ټولنې د عامې روغتيا د امنيت په خوندي ساتلو کې يې خورا زيات خدمتونه کړي دي. چين په خپلو اقداماتو سره د انسانانو د ګډ برخليک ټولنې ژور او غني محتويات بيان کړي دي.
دوی يو له بل سره ګډ برخليک لري او له نورو سره ګډ ګامونه پورته کوي. د څه باندې ۱۷۰ هېوادونو مشرانو او ۴۰ نړيوالو او سيمه ييزو سازمانونو مسؤلينو د ويروس پر ضد د چيني مبارزې له کبله په جلا جلا توګه له چين څخه خپله خواخوږي او ملاتړ څرګند کړ او ډېری دوست هېوادونو، نړيوالو يا سيمه ييزو سازمانونو ان ځينو ولسي بهرنيانو موږ ته زياتې مرستې برابرې کړې دي. موږ به دا هېڅکله هېر نه کړو چې دوکتور بروس ايرود د روغتيا نړيوال سازمان د کارپوهانو ګروپ په مشرۍ سره ووهان ښار ته لاړ، هلته يې ليدنې کتنې وکړې او نړيوالو ته يې د چينايانو زړورې کيسې بيانې کړې. زموږ به په یاد وي چې د ځينو هېوادونو مشرانو په ستونزمن وخت کې چين ته سفر وکړ او له چينايانو یې خپل ټينګ ملاتړ اعلان او نيکې هيلې وړاندې کړې. زموږ به دا هم په یاد وي چې ځينو بهرنيو محصلينو په چين کې پاتې کېدل غوره وبلل او د ويروس پر ضد په مخکنۍ کرښه يا د اورګاډيو په سټېشنونو کې يې د داوطلبانو دندې پر غاړه واخیستې. دا به مو هم په یاد وي چې د بېلا بېلو هېوادونو ولسي خلکو چينايانو ته ”چينه، تکړه شه! ووهانه، تکړه شه!“ په څېر ټينګ ملاتړ او نيکې هيلې وړاندې کړې دي.
”څوک چې ما ته شفتالو راکړې، په ځواب کې به قيمتي ډبرې ورکړم. “ دا له څو زرو کلونو راهيسې د چيني ملت عنعنوي دود او د چين لخوا د انسانانو ګډ برخليک ټولنې ابادۍ د پرمخبيولو یو ضروري انتخاب هم دی. منندوی چينايان اوس تر خپلې وسې پورې نړۍ ته پخپلو ځوابي کارونو او خدمتونو بوخت دي، موږ له هغو هېوادونو او سيمو سره يو شان احساسات لرو او خپل زغم مو شريک کوو چې پکې د ناروغانو شمېر په چټکۍ سره ډېرېږي. چين د خپلې مبارزې تر څنګ د مرستې رسولو لاسونه اوږد کړي. تر اوسه پورې يې پاکستان، لاوس، تايلنډ، ايران، کوريا جمهوريت، جاپان، ايټاليا او د افريقايي هېوادونو ټولنې په شمول زياتو هېوادونو او سيمو ته د بيړنۍ اړتيا وړ طبي توکي برابر کړي، ايران، عراق او ايتاليا ته يې د طبي کارپوهانو ډلې لېږلي او د ويډيويي غونډو له لارې يې له اړوندو هېوادونو او نړيوالو سازمانونو سره د ناروغۍ د درملنې او مخنيوي تجربې شريکې کړې دي. پردې سربېره، د چين د جدي او اغېزناکو تدبيرونو د نړيوالو لپاره زيات وخت سپما کړی او تر زياتې اندازې پورې يې د نورو هېوادونو فشارونه کم کړل.
چين او افغانستان ګډ برخليک لري او خپلمنځي اړيکې له ويروس سره په ګډه مبارزه کې پياوړې کېږي. افغانانو آن ددغې مبارزې په پيل کې چين ته خپل ملاتړ څرګند کړی. ولسمشر اشراف غني، پخواني اجرائيه رئيس عبدالله عبدالله، د ولسمشر دوهم مرستيال سرور دانش، د بهرنيو چارو سرپرست وزير هارون چخانسوري، د عامې روغتيا وزير ډاکتر فيروزالدين فيروز، د دفاع سرپرست وزير اسدالله خالد، د کورنيو چارو سرپرست وزير مسعود اندرابي، د افغانستان او چين د دوستۍ ټولنې، د ورېښمو لارې څېړنيز مرکز په جلا جلا توګه له چين څخه ملاتړ څرګند کړی دی. څو تنو افغان ملګرو چې پخوا یې په چين کې زده کړې، د چيني سفارت له لارې چينايانو ته د بيړنۍ اړتيا وړ يو شمېر طبي توکي ورکړل، ځینو کسانو د پيسو بسپنې کړې او له چيني سفارت څخه يې غوښتنه کړې چې هرومرو دې داسې پيسې تر ټولو د اړتيا وړ ځايونو ته ولېږي. دا چې افغانان په ستونزمن وخت کې تل د چين تر څنګ ولاړ دي، دا به زموږ چينايانو هېڅکله هېر نشي. چيني حکومت د ووهان په شمول ټول چين کې پاتې شويو افغان محصلينو ته زياته پاملرنه کړې ده، دوی تر اوسه ټول روغ او جوړ او ژوند يې نورمال روان دی. د چين د بهرنیو چارو وزارت، د روغتيا ملي کمېټې، د ناروغيو د وقايې او کنټرول مرکز او ګمرکاتو عمومي ادارې اړوندو کارپوهانو او چارواکو د نو روز په ورځ د افغانستان د بهرنيو چارو او عامې روغتيا وزارتونو له کارپوهانو سره يوه ۴ ساعته ويډيويي ناسته جوړه کړه او د چين تجربې یې ور سره شریکې کړې. د چين حکومت، سفارت او تصدۍ به بيا په خپلو کوښښونو سره افغانانو ته د طبي او وقایعې توکو مرستې برابرې کړي څو چې افغانان ژر له دې ستونزې را ووځي. د ناول کرونا ويروس پر وړاندې چين او افغانستان د یو او بل مرسته کوي او لاس په لاس، اوږه په اوږه په ګډه سره د انسانانو د ګډ برخليک په اړه يوه خوندره موسيقي غږوي.
ويروس له سرحدونو سره خپرېږي. ټول انسانان باید ددې ویروس د مخنیوي لپاره کار وکړي. چين د ناول کرونا ويروس پر ضد د مبارزې په مخکنۍ کرښه کې ولاړ دی، زياتې قربانۍ يې ورکړې او په ټوله نړۍ کې د دغه ويروس د خپرېدو د مخنيوي په موخه لا هم خپله دنده تر سره کوي. خو ځينو کسانو په تنګ نظرۍ، مغرورۍ او بې پوهۍ سره پر چين تور ولګاوه او د عامې روغتيا دغه پديده يې پر چين د بريد پر وسلې بدل کړه. دغه ډول بې دليله او شرمناکې خبرې کوونکي خلک به په خپله د چينايانو او نړيوالو پر وړاندې ماتې وخوري او مختوري به شي.
يو چيني متل چې وايي، يووالی خپله یو ځواک دی. دې ساري ناروغۍ ته د ماتې ورکولو لپاره يووالی او همکاري تر ټولو قوي وسله ده. د جهاني کېدو په دغه زمانه کې چې تاسو موږ لری او موږ تاسو لرو، نو انسانان باید په ګډو هڅو سره د انسانانو د ګډ برخليک ټولنه جوړه کړي، ګډې ګټې موندلای او د انسانانو ګډه راتلونکې خوندي ساتلای شو.
