عمران خان: د افغانستان سوله د ټولې سیمې لپاره مهمه ده

د پاکستان لومړي وزیر یو ځل بیا ویلي چې د افغانستان سوله د ټولې سیمې د پرمختګ لپاره مهمه ده. د پاکستان لومړي وزیر عمران خان د ولسي جرګې له مشر میر رحمان رحماني سره د لیدنې پر مهال ویلي چې پاکستان له افغان سولې سره بشپړه همکاري کوي او تمه لري چې په دغه هېواد کې روانه خونړۍ جګړه ژر تر ژره پای ته ورسېږي. دده په خبره د افغانستان سوله او ثبات د ټولې سیمې له اقتصادي ودې سره مرسته کولی شي او په سیمه کې به د هېوادونو ترمنځ سوداګریزې او اقتصادي اړیکې پراخې شي. دده په خبره د مرکزي او جنوبي اسیا ترمنځ د سوداګرۍ او ترانزیت تر ټولو مهمه لار له افغانستان تېرېږي او که په دغه هېواد کې سوله او امنیت تامین شي د سیمې د هېوادونو له اقتصادي ودې سره به مرسته وکړي. عمران خان یو ځل بیا ویلي چې پاکستان له افغان سولې سره د همکارۍ لپاره ژمن دی. نوموړی داسې مهال دغه څرګندونې کوي چې پاکستان په افغانستان کې د روانې خونړۍ جګړې ملاتړی بللی کېږي او د سولې په برخه کې یې اقداماتو ته د شک په سترګه کتل کېږي.