له اوو کلونو وروسته د امریکا فدرالي حکومت تر بيا تړل کېدو وروسته د ټرمپ حکومت او ديموکراتيک ګوند ترمنځ جګړه مخ په زياتېدو ده. د ټرمپ حکومت د فدرالي حکومت د تړل کېدو په پلمه د ديموکرات ګوند له خوا ملاتړ شوې پروژې کمې کړې دي. د ديموکراتيک ګوند په مشرۍ فدرالي ارګانونه يې ړنګ کړي دي. خو د دې حالت پر وړاندې ديموکراتانو بې ساري يووالی ښودلی، څو په دې شخړو کې د خلکو ملاتړ بيا تر لاسه کړي.
د امريکا د عامه افکارو په اند د فدرالي حکومت د تړل کېدو په هکله د دوو ګوندونو ترمنځ جګړه له پخوانيو جګړو سره ډېر توپیرونه لري. هغوی په ډېرې دښمنۍ او ناوړه نيت سره د دوو ګوندونو ترمنځ جګړه او تضادونه تشديد کړي دي. دا نه يوازې د دې هېواد د سياسي افراطيت ښکارندويي کوي بلکې امریکايانو ته يې ډېر زيانونه رسولي دي.
لومړی توپير: ټرمپ د فدرالي حکومت د تړل کېدو په پلمه د ديموکرات ګوند پر ضد مبارزه زیاته کړې ده.
ټرمپ په وروستيو کې داسې ويلي چې د فدرالي حکومت تړل موږ ته ګټې راوړي او د ډيموکرات ګوند په تړاو به ډېر څه له منځه يوسو.
د امريکا د انرژۍ وزارت د اکتوبر په دوهمه نېټه په ۱۶ ایالتونو کې د انرژۍ ۲۲۳ پروژو د بندولو اعلان کړی چې ارزښت يې شاوخوا اووه ميليارده او ۵۶۰ میليونه امریکايي ډالره دی. د اې پي خبري اژانس خبر ورکړی چې تېر کال د ولسمشرۍ په ټاکنو کې د دغو ايالتونو خلکو د ديموکرات ګوند کانديد ته موافقې رايې ورکړې او څو ورځو نه مخکې د دې ګوند پارلماني غړو د پيسو ورکولو په هکله د جمهوريپال ګوند له خوا د وړاندې شوې لنډمهاله قانوني مسودې پر وړاندې هم مخالفې رايي ورکړې دي.
ټرمپ وايي چې حکومت به يې د فدرالي حکومت د تړل کېدو پر مهال د حکومتي کارمندانو د کمولو پلان د پلي کولو لپاره هڅې وکړي، چې ډېر حکومتي کارکوونکي به له خپلو دندو څخه ګوښه شي او په دې لړ کې زياتره به يې د ديموکرات ګوند غړي وي.
د امریکا خبري رسنيو د تبصرې په ورکولو سره ويلي چې جمهوريپال ګوند د سزاوو په څېر اقدامات کړي او له دې څخه ښکاري چې دا د دوو ګوندونو ترمنځ مبارزه له پخوانيو مبارزو سره ډېر توپير لري.
دويم توپیر: د ډيموکرات ګوند بې ساري يووالی ښودلی دی.
د سنا مجلس د ډيموکراټ غړي کليس موفي پر ټولنيزو رسنيو ليکلي چې د فدرالي حکومت د تړل کېدو پر مهال د ټرمپ غير قانوني عملونه بې ساري دي، نو موږ باید ورته سر ټيټ نه کړو. څو امريکايي خبري رسنيو خبر ورکړی چې د ډيموکراټ ګوند په دننه کې بې اتفاقۍ حالت بدل کړی او ډاډ يې ورکړی چې د طبي بيمې د لګښت د کمولو لپاره به له جمهوريپال ګوند سره مبارزه وکړي. د اې پي خبري اژانس اوسني وخت د ډيموکراټ ګوند بې ساري يووالی شېبه بللې ده. د ميريلينډ پوهنتون د نړیوالو چارو او امنيت د څېړنيز مرکز څېړونکي کلا لاموچ په دې اند دی چې تر دې وړاندې ډيموکراټ ګوند له جمهوريپال ګوند سره په مبارزه کې څو ځله ورته سر ټيټولی چې د ملاتړکوونکو انډول يې تر زياتې اندازې پورې راټيټ شوی دی. نو ډيموکرات ګوند هيله لري چې دا ځل له جمهوريپال ګوند سره د جګړې له لارې د خلکو ملاتړ بیا تر لاسه کړي او راتلونکي کال کې د منځنۍ مودې لپاره په ټاکنو کې د خلکو لا زيات ملاتړ او مالي مرستې لاسته راوړي.
درېیم توپير: د دوو ګوندونو ترمنځ دښمنۍ او بد چلندونه د پخوا په څېر نه دی.
د سپينې ماڼۍ د پخواني چارواکي پيټريک ګريفين په اند د پخوا په پرتله د دوو ګوندونو ترمنځ اوسنۍ مبارزې تر ټولو لوی توپير دا دی چې د دوی ترمنځ دښمنانه فضا لا خرابه شوې ده. د ده په خبره دا یې بنسټیز توپیر بللی دی.
د امریکا خبري رسنيو خبر ورکړی چې د فدرالي حکومت تړل به د دې هېواد د دوو ګوندونو ترمنځ پر اوږدمهاله مبارزې بدل شي او د پخوا په پرتله پر اقتصاد او سياست لازياته منفي اغېزه کولای شي.
د امریکا د بې طرفه ډلو د عامه خدمتونو د همکارۍ سازمان مسؤل مکس سټيل ويلي چې دغه مبارزه او جګړه به خامخا هېواد ته زيانونه ورسوي چې موږ ټول به زيانمن شو. دا به د هېواد او هېوادوالو لپاره لا ستونزمن کار وي.