ډبلیو ایچ او: افغانستان او پاکستان کې د پولیو له منځه وړلو ته ژمنتیا لرو

د روغتیا نړیوال سازمان (ډبلیو ایچ او) خبر ورکړی، چې په افغانستان او پاکستان کې د ګوزڼ ویروس (پولیو) له منځه وړلو ته ژمنتیا لري. یاد بنسټ پرون په یوه خپاره کړي راپور کې ویلي، چې دا ژمنه د سعودي عربستان د ۵۰۰ میلیونو ډالرو مرستې او د متحد عرب اماراتو پرلپسې ملاتړ سره پیاوړې شوې ده. د ملګرو ملتونو دغه بنسټ هیله ښودلې، چې د پولیو ویروس به ژر له منځه لاړ شي. د یادونې ده چې پولیو ویروس د نړۍ په نورو هېوادونو کې د پراخ واکسیناسیون له لارې له منځه تللی، خو افغانستان او پاکستان دوه یوازیني هغه هېوادونه دي چې تر اوسه پکې  دا ویروس په بشپړ ډول نه دی ختم شوی.