د چین د دولت رئیس شي جین پینګ څو ورځې مخکې په یوه وینا کې دې ته اشاره وکړه، چې چین د یو مسولانه لوی هېواد په توګه پر سوله، پرمختګ، مساوت او عدالت او چیني ملت له ګاونډیو سره پر نږدې او دوستانه رویې ټینګار کوي، چې دا ټول د بشر له خوا پېژندل شوي ګډ ارزښتونه دي. چین د ګډې مشورې، ابادۍ او شریکو ګټو پر اساس د نړۍ پر اداري نظریې ټینګار کوي او د سولې، ورخلاصون، همکارۍ او ګډ پرمختګ پر لارې ګامونه پورته کوي. که موږ د سولې او پرمختګ پر لار خپلو ګامونو ته دوام ورکړو او د نړۍ د بېلابېلو هېوادونو سره یو ځای د بشر د ګډ برخلیک ټولنه جوړه کړو، نو خامخا به د بشر ځلانده راتلونکی ولرو. رئیس شي جین پینګ نړۍ ته د سولې او عدالت د ساتلو او د ګډ برخلیک ټولنې د ابادۍ غږ وکړ او افغانانو ته یې د چین او افغانستان د سوله ییز او ښه روښانه راتلونکي په پار واضح معلومات وړاندې کړل.
چين د سولې ليواله او ملاتړی دی او چينایان د سولې مينه وال دي. چين د نولسمې پېړۍ له نيمايي راهيسې جګړې ځپلی، نو د جګړو د بې رحمۍ او د سولې پر قيمت او ارزښت ښه پوهیږي او په اړه يې ژور احساس لري. چينايان پاروونکي کړنې نه کوي، خو د نورو له لمسوونکو کړنو هم نه ډاريږي. چين د وطنپالنې، اتلوالۍ، خوشبينۍ، وفادارۍ او نړيوالتوب په روحيه د خاورو د بشپړتيا او د هېواد د سولې او آرامۍ د ساتلو په هڅه کې دی او سوله، درناوی او ملاتړ يې تر لاسه کړی دی. چين تل د ملي دفاع پر دفاعي پاليسۍ ټينګار کوي او هيڅکله یې په نړۍ کې باداري او پراخوالی نه ده غوښتي او له تسلط غوښتنې او زورواکي سياست سره ټينګ مخالفت کوي. چين د خپل ملي حاکميت، امنيت او ګټو زيانون نه شي زغملی او هيڅکله به د چين پر خاورو تيري کوونکو او بېلتون غوښتوونکو کړنو ته اجازه ور نه کړي.
چين د نړيوالې سولې د هڅولو مهم ځواک دی. چين د دوهمې نړيوالې جګړې په موده کې د فاشيزم ضد د نړيوالې مبارزې ختيځ جنګي ميدان پرانيست، چينايانو د دولت، ملي احيا او بشري عدالت لپاره جنګ وکړ او له نورو سوله او عدالت پلوي هېوادونو او خلکو سره يې يو ځای د فاشيزم ضد جګړه کې ستر بريالیتوب تر لاسه کړی او د نړيوالې سولې لپاره يې مهم خدمتونه کړي دي او نور ملتونه او خلک يې هڅولي، چې د ملي خپلواکۍ او د خلکو د ازادۍ لپاره مبارزه وکړي. د چين ولسي جمهوريت له جوړېدو راهيسې د چين کمونېست ګوند تر مشرۍ لاندې په دغه هېواد کې بې ساري بدلونونه او پرمختګونه رامنځته شوي، د چين ځانګړتيا لرونکی سوسياليزم نوې زمانې ته داخل شوی، چيني ملت خپلواک، شتمن او ځواکمن شوی او د نړيوالې سولې مهم خدمت کوونکی ګرځېدلی دی. د چين پوځ تل د نړيوالې سولې کلک ساتونکی ځواک پاتې شوی، ۲۵ ځله يې د ملګرو ملتونو په سوله ساتو عملياتو کې ګډون کړی، ۴۰۰۰۰ سوله ساتي سرتيري يې ورلیږلي دي، او چين د ملګرو ملتونو د امنيت ساتونکو عملياتو عمده عسکر استونکی او دوهم لوی پانګه اچوونکی هېواد دی. ملګرو ملتونو د چين ستاينه کوي، چې له تېرو زياتو کلونو را هيسې يې د نړيوالې سولې او پرمختګ لپاره هڅې کړي، په تيره بيا د سوله ساتو عملياتو، د سيمه ييزو مسئلو د حل او د پرمختيايي هېوادونو ترمنځ د همکارۍ او ګډ پرمختګ د پياوړتيا لپاره يې مهم خدمتونه کړي دي.
چين د نړيوال نظام کلک ساتونکی ځواک دی. نړۍ اوس له کوويډ-۱۹ وبا او داسې بدلون سره مخ ده، چې ساری يې په تېرو سلو کالونو کې نه دی لیدل شوی، نړيوال حالات پېچلي شوي، د سړې جګړې نظريې، د صفر- جمع ذهنیت (mentality zero-sum) او يو اړخيزم پر نړيوال نظام او اخلاقي بنسټ حمله کوي او نړۍ د لارو په تقاطع کې ولاړه ده. چين د نړيوال نظام ساتونکی او د څو اړخيزم عملي کوونکی دی او د ملګرو ملتونو د منشور پر اصولو او پر همکارۍ او عدالت ټينګار کوي او د انسانانو د ګډ برخليک ټولنې د ابادۍ په هڅه کې دی. لکه څنګه چې د چين د دولت رئيس شي جين پينګ ويلي، د نړۍ د ستونزو او ننګونو حل د بېلا بېلو هېوادونو ګډې همکارۍ ته اړتيا لري، نو سوله، پرمختګ، همکاري او ګډ برياليتوب د انسانانو مناسبه لار ده.
چين د ګردې کرې د ګډ برخليک ټينګ ځواک دی. د چيني ژبې متل دی، وايي د کمبود په وخت کې بايد د خپل پرمختګ لپاره هڅې وشي او د پياوړتيا په وخت کې بايد له نورو سره مرسته وشي. چين نه یوازې خپل اقتصادي پرمختګ ته پاملرنه کوي، بلکې د نورو هېوادونو د اقتصادي پرمختګ لپاره يې رغنده خدمتونه کړي دي. چين د يو کمربند او يوې لارې د ابادۍ لپاره تر اوسه له ۱۳۸ هېوادونو او ۳۰ نړيوالو سازمانونو سره ۲۰۰ همکاريز تړونونه لاسليک کړي او ۲۰۰۰ ګډې پروژې يې ورسره تر سره کړې دي. نړيوال اقتصاد د کوويډ-۱۹ وبا د خپرېدو له امله مخ پر ځوړ روان شوی دی. چين له يادې وبا څخه وتلی او اقتصادي مثبت پرمختګ يې خوځيدلی دی او د يو کمربند او يوې لارې په اوږدو پرتو هېوادونو کې يې پانګونې زياتې کړي، د وبا د وقايوي توکو ترانسپورټي لارې يې پرانیستلي او نړيوال عرضي ځنځير يې ثابت کړی، څو د بېلا بېلو سيمو ترمنځ سوداګريز تګ راتګ و نه تړل شي. چين د یو کمربند او يوې لارې پر مټ د نړيوال اقتصاد د احيا لپاره مسلسل خوځنده ځواک برابر کړی او دا د نړيوال اقتصاد لپاره د چين خدمت دی.
چين د افغانستان د دايمي سولې او پرمختګ ټينګ ملاتړی ځواک دی. چين د افغانستان د دوستانه ګاونډي هېواد په توګه تل پر ښه ګاونډيتوب او خوندي او سمسورې ډيپلوماتيکې مفکورې ټینګار کوي او له افغانستان سره د ګډ برخليک ټولنې د ابادۍ او د سوله ييز، ثابت او سمسور راتلونکي لپاره هڅې کوي. له تېرو شلو کلونو راهيسې چين د افغانستان له ملي امنيت، ثبات او اقتصادي پرمختګ څخه ټينګ ملاتړ کړی او د دغه هېواد د سولې، بيارغونې او روغې جوړې بهير لپاره يې تر خپلې وسې پورې ورسره مرستې کړې دي. اوس د افغانستان د سولې بين الافغاني خبرې اترې روانې دي او دغه هيواد له مهمې تاريخي مرحلې سره مخ دی. چين به د پخوا په شان رغنده رول ولوبوي، چين د افغانانو په لارښوونې او حاکميت د دغه هېواد د سولې او روغې جوړې ملاتړ کوي او په دې بهير کې د سولې پر لومړيتوب او سياسي حل پر لوري او پر ټولشموله، متحد او ثابت چوکاټ ټينګار کوي او هيله لري، چې په دغه هيواد کې ژر سوله رامنځته شي. د دې تر څنګ، چين به له کوويډ-۱۹ ويروس او طبيعي ناورينونو سره د مبارزې په برخه کې له افغانستان سره مرستې وکړي او د دغه هېواد د اقتصاد او د خلکو د ژوند د ښه والي لپاره به هڅې وکړي.
تاريخ ثابته کړې، چې عدالت د زورواکۍ ځواک مات کړی او سوله او پرمختګ نه بدليدونکی جريان دی. چين او افغانستان لرغوني متمدن هيوادونه دي، چې له ډېرو جګړو څخه تير شوي، د جګړو د بېرحمۍ او د سولې ارزښت په اړه ښه پوهیږي. دواړه هېوادونه به د سولې، پرمختګ او سمسورتيا په اساس د چين او افغانستان د ګډ برخليک ټولنې د ابادۍ لپاره ګډې هڅې وکړي، د افغانستان او د دې سيمې د سولې لپاره به سوله ییز ځواکونه برابر کړي او د دواړو هېوادونو خلکو ته به د سولې نعمت او لا زياتې ګټې ورسوي.
لیکنه: په افغانستان کې د چين سفير؛ وانګ يو
