باجوه: پر ډیورنډ کرښه اغزن تار غځول به دوام ولري

د پاکستاني پوځ مشر جنرال قمر باجوه ویلي، پر ډیورنډ کرښه به د اغزن تار لګولو چاره دوام ولري او په وینا یې دا کار د کرښې دواړو غاړو ته د امن په موخه کوي. پر دغه کرښه اغزن تار چې لر او بر پښتانه یې د افغانانو پر سینه ناسور زخم بولي خو باجوه د امن سرای بللی او د بشپړېدو ژمنه یې کړې ده. نوموړي دغه راز په افغانستان کې امن د پاکستان په ګټه بللی دی او د افغان سولې برخه کې یې د خپل هېواد پر بشپړې همکارۍ ټینګار کړی دی. پر ډېورنډ فرضي کرښه غځېدونکي تار باندې د کرښې دواړو غاړو پښتنو تل توند غبرګونونه ښودلي دي خو افغان حکومت یې پر وړاندې چوپه خوله دی او ډېری کارپوهان بیا په دې باور دي چې حکومت پر یاده کرښه معامله کړې ده.