بغلان کې د ترافیکي پېښې له امله ۴۸ کسانو ته مرګ‌ ژوبله اوښتې

د بغلان ولایت په شمالي سالنګ کې د یوې ترافیکي پېښې له امله ۶ تنه مړه او ۴۲ نور ټپیان شوي دي. ا پېښه تېره شپه د شمالي سالنګ د پنځمې ګولايي په سیمه کې د ۵۸۰ ډوله بس د چپه کېدو له امله رامنځته شوې ده. د بغلان د امنیې قومندانۍ ویاند شیر احمد برهاني ویلي، چې پېښه د سخت طوپان او د سړک د یخ ‌بندۍ له امله رامنځته شوې او بس له اصلي لارې اوښتی او چپه شوی دی. د نوموړي په وینا، په ټپیانو کې دوه ښځې او دوه ماشومان هم شامل دي، چې روغتیايي مرکزونو ته لېږدول شوي دي. د بغلان د عامې روغتیا رییس وايي، د پنځو ټپیانو روغتیايي حالت نازک دی او د اړتیا په صورت کې به د لا ښې درملنې لپاره د کندوز ولایتي روغتون ته ولېږدول شي.