“زوټوپیا ۲” فلم په چين او نړۍ کې د ډېرو خلکو پاملرنه راجلب کړې او د ډسمبر تر ۱۶مې نېټې پورې يې په نړۍ کې د ۱ اعشاریه ۲ ميلیارډو ډالرو په ارزښت ټکټونه پلورل شوي دي.
“زوټوپیا ۲” د نړۍ د پیاوړي فلم جوړونکي شرکت والټ ډیسني له لوري جوړ شوی او په چين کې يې د ټکټونو د پلور له درکه د سینماګانو درامد ۵۰۶ میلیونه ډالره ښودل شوی، چې دا رقم د امریکا او کاناډا د سينماګانو د عمومي درامد په پرتله زياتوالی ښيي.
شمېرې ښيي، د چین فلمي بازار پر نړیوالو کولتوري چارو ژوره اغېزه لري او دا د چین او امریکا د اقتصادي او سوداګریزو اړیکو د متقابل ګټور طبیعت ساری هم بلل کېږي.
“زوټوپیا” فلم په لومړي ځل په ۲۰۱۶م کال کې په چین کې خپور شوی او د “جوډي” او “نیک ” کارټوني رولونو له کبله یې شهرت موندلی دی.
د “زوټوپیا ۲” له خپرېدو وروسته، دغه فلم یو ځل بیا د نړۍ پاملرنه راجلب کړې ده.
په چین کې څه د پاسه ۹۱ میلیونو کسانو دغه فلم کتلی، چې دغه شمېر په دغه هېواد کې د واردو فلمونو په سر کې ځای لري.
په ګردې نړۍ کې د بېلا بېلو هېوادونو د فلمونو خپرېدل په اصل کې يو ډول سوداګري بلل کيږي، چې بريا يې په نوښتګر ډيزاين او غوره کيفيت پورې اړه لري. د “زوټوپیا” په څېر فلمونه د چین د فلمي بازار د ځواکمن نفوذ څرګندويي کوي او د چین او امریکا د اقتصادي، سوداګریزو او کولتوري چارو د ګډ پرمختګ لپاره پراخې ګټې لري.
امریکایي رسنيو “زوټوپیا ۲” فلم ته پراخه پاملرنه کړې او په راپورونو کې يې بیا بیا د چين يادونه کړې ده.
راپورونه وايي، په چین کې د “زوټوپیا ۲” فلم بریالیتوب یو ځل بیا دا په ګوته کوي، چې چيني بازار په نړۍ کې د هالیوډ فلمونو د بریالیتوب لپاره کیلیدي رول لري. دا په اقتصادي او سوداګریزو چارو کې د چین او امریکا ژور متقابل انحصار هم منعکسوي.
په ۲۰۲۴م کال کې، د چین او امریکا دوه اړخیز سوداګريز ارزښت له سوداګریزو کړکیچونو سره سره بیا هم ۶۸۸ اعشاریه ۲۸ ملیارډو ډالرو ته رسیدلی و، چې دا غښتلی انعطاف ښیي.
ځینو امریکایي سیاستوالو په دې وروستیو کلونو کې بیا بیا ويلي، چې د چین او امریکا ترمنځ د توکو سوداګرۍ کې بيلانس نه شته او چين تر امريکا ډېرې ګټې اخلي. خو دوی پر دغه حقیقت سترګې پټې کړي، چې امریکا د چین د خدماتي سوداګرۍ د کسر تر ټولو لویه سرچینه ده او د دوه اړخیزو اقتصادي تبادلو ګټې يې متوازېنې دي.
د سوداګرۍ نړیوال سازمان مالومات ښيي، چې په ۲۰۲۳ م کال کې د امریکا د خدمتي سوداګرۍ انډول له یو ټریلیون ډالرو څخه زیات و، چې دا د نړیوال خدمتي سوداګریز انډول ۱۳ سلنه جوړوي. په دې برخه کې، امریکا له ډېرو لویو اقتصادونو سره سوداګرۍ کې تر نورو ډېرې ګټې اخيستې او په ۲۰۲۴م کال کې يې مثبت بیلانس کابو ۳۰۰ ميلیارډو ډالرو ته رسیدلی و.
په چین کې د “زوټوپیا ۲” فلم بریالیتوب ناڅاپي نه دی، بلکې دا د چین او امریکا ترمنځ د کلتوري تولید او د اقتصادي پرمختګ پایله ده.
حقیقتونو دا ثابته کړې، چې چین او امریکا د ور خلاصون او همکاريو له لارې کولی شي ګډو بریالیتوبونو ته دوام ورکړي.