ایران په تهران کې د برېتانیا سفیر احضار کړی

ایراني رسنیو ویلي، چې د دغه هېواد د بهرنیو چارو وزارت لندن کې د ایران پر سفارت د معترضینو د هجوم ور وړلو او د برېتانیا د بهرنیو چارو وزیر د وروستیو څرګندونو له کبله په تهران کې د برېتانیا سفیر احضار کړی. تسنیم خبري اژانس ویلي، چې په دې احضاریه کې د دغې پېښې او د برېتانیوي چارواکو د وروستیو څرګندونو له امله د ایران رسمي اعتراض د دې هېواد سفیر ته سپارل شوی. د ایران د بهرنیو چارو وزارت د ایران د سفارت، ډیپلوماتانو او کارکوونکو او په دې هېواد کې د ایران د ډیپلوماتیکو ځایونو په ساتنه کې د برېتانیا دولت پر مسولیت ټینګار کړی. ورته مهال، د برېتانیا سفیر هم پر دغه پېښه خواشیني ښودلې او ویلي یې دي، دغه موضوع به له لندن سره شریکه کړي.