د راپورونو له مخې پر پاکستاني عسکرو هغه مهال برید شوی دی چې په جنوبي وزیرستان کې فرضي کرښې ته څېرمه په ګزمه بوخت و. پاکستانی پوځ وایي چې په پېښه کې دوه عسکر ټپیان شوي او برید هم له افغان لوري پر دوی شوی دی. پاکستان پر ډیورنډ فرضي کرښه په غیر قانوني توګه اغزن سیم تېر کړی دی چې وخت ناوخت فرضي کرښې ته څېرمه د پرتو ولسونو له غبرګون سره مخ شوی دی. په ځینو برخو کې دغه اغزن سیم نړول شوی او ولسونه د پاکستاني عسکرو پر وړاندې هم درېدلي دي. ددغه برید مسوولیت تراوسه کومې ډلې نه دی منلی.
