ایران، روسیې او هند د افغانستان پر سوله درې اړخیز کنفرانس ترسره کړی دی. د راپورونو له مخې دغه کنفرانس په مسکو کې جوړ شوی و او یادو هېوادونو په افغانستان کې پر روان تاوتریخوالي اندېښنه ښودلې ده. ددغه کنفرانس ګډونوالو رسنیو ته ویلي چې د افغان حکومت او طالبانو ترمنځ مذاکرات بن بست ته رسېدلي، هېڅ راز پرمختګ نه لري، تاوتریخوالی ډېر شوی دی او دې مسئلې د سیمې امنیت ته خطرونه او ګواښونه متوجه کړي دي. دوی پر دې غږېدلي چې څنګه وکړی شي د افغانستان د سولې په مسئله کې همکاري وکړي او دواړه لوري دې ته وهڅوي چې په خپلو دریځونو کې نرمښت راولي. د سیمې هېوادونو تر دې وړاندې هم په افغانستان کې پر روان وضعیت اندېښنه ښوودلې او دلته یې د سولې له پروسې ملاتړ کړی دی. دوی ټینګار کړی چې روانه جګړه باید ژر تر ژره د خبرو له لارې ختمه کړل شي او افغانان دې د مذاکراتو له لارې یوه تفاهم ته ورسېږي.
