دې ورځو کې اورم چې د پنجاب د پوځ راشني ځیره خواره ملایان، چې اکثر یې د فرنګي سازش پر بنسټ په مسلمانو خاورو کې د شر او فساد ډاګیان دي، د افغانستان په کورنیو چارو او روانو سیاسي بدلونونو کې افراطي او توندلاري دریځونه نیسي.
زموږ خطاب له افغان دریځه دوی ته دا دی چې ستاسو او ننګ یې سره څه؟؟ ستاسو او زموږ ایمان او اسلام ته د خطر یې سره څه؟؟ تاسو پرون هم د اسلامي امت د ټوټه کولو، بېلتون او تفرقې سبب شوي یاست او نن هم یاست، لومړی مو د بنګال په سر د پنجاب د خوندیتابه لپاره معامله وکړه، بیا مو د پنجابي یهودیت پر بنسټ د مسلمانو بنګیالانو معصوم او مظلوم عزتونه، حرمتونه او شرافتونه ور ولټول.
تاسو او خدای د کشمیر د مسلمانانو په سر مو د پنجابیانو د ځمکو د خړوبولو په پاره د سیند طاس تړون په نوم له همدغو هندوانو سره معامله ونه کړه؟ د سړې جګړې پر مهال مو د نړۍ ټولو کفارو ته په خپل ملک کې اډې ورنه کړلې؟ همدا اوس له بحرین، اماراتو او سوډان سره د اسراییلو د اړیکو په جوړولو کې د پنجاب د رول اړوند، د فاکس نیوز راپور د څه شي کیسه کوي؟ د (آی اېس آی) او (سې آی اې) تر منځ د افغان مجاهدینو د جنګولو او د طالبانو د اسلامي حکومت د راپرځولو مستند راپورونه د کوم اسلامیت یادونه کوي؟ پر افغانستان د یرغل او د طالب د راپرځولو امریکایي قومنداني، رهبري او کوردینات ستاسو د رهبرانو په اجازه، ستاسو د استخباراتو په همکارۍ او ستاسو له ملایانو سره په معامله ونه شول؟ لعل جومات ستاسې واکمن بمبارد نه کړ؟ ډاکتره عافیه صدیقي ستا د جاسوسانو د مالوماتو پر بنسټ امریکا ته ونه سپارله شوه؟ تا کرتارپور له هندو پنجابي سره د پنجابیت د اړیکې پر بنسټ ۲۴ ساعته پرانیستی نه و؟ پر پښتون او مسلمان افغان دې له کراچۍ تر پینډۍ لارې ونه تړلې؟ ستا د استخباراتو پخوانی مشر اسد درانی امریکا ته د القاعدې شبکې د مشر اسامه بن لادن په سر د پاکستان د همکارۍ اړوند اعتراف، د کوم اسلام او ورورولۍ کیسه کوي؟
سیکولار قانون، ملحد نظام، فاسد حکومت او په خاوره کې مو د منکراتو، فحاشیو، بې دینیو او بې حسابه اخلاقي ځوړتوبونو خو مو شمېر نه کیږي.
د دې ټولو اړوند د سمیع الحق، حامد الحق رسنیز دریځ؛ فتوی، لاریون او جدجهاد چیرته وو؟ ملا فضل الرحمن کله دا شرارت، فتنه او فساد بللي؟ کله مو خپل غږ پورته کړی دی او د اسلام د سپېڅلي دین له دریځه مو د پنجاب سیکولاره واکمني غندلې، ننګولې او غبرګون مو ښکاره کړی دی؟
همدا ټول غیرتونه، عزتونه او عزمتونه هم بې حسابه وګڼئ، د پنجابي ملا او مسلمان وجدان ولې ویښ نه و؟ ایمان یې چېرته و او د دین غم یې په کومه تاخچه کې اېښی و، چې پر افغان وطن د امریکا او یرغلګرو متحدینو د یرغل تېره ۲۰ کلنه اوږده موده کې ولې د دوی له خاورې د همدغه یرغل په ترانسپورټي کاروانونو، خوراکي توکو، ټانګونو، بمونو او د مسلمان وژنې په کتارونو برید ونشو؟ دا یې ولې ذهن ته رانغلل؟ دا اسلامیت ترې کومو اوبو وړی و او که دا هم نشوای کېدای، نو پر خپل حکومت او ریاست خو به یې کله هم فشار راوړی و، چې د افغان- مسلمان د وژلو وسایل منع کړي.
د بابړې ننګه، په پنجابي- فرنګي جبر کې د پښتون او بلوڅ مسلمان د قتل عام، اسراییلي محکومیت او نازیستي ټولوژنې داستان او کیسه خو هسې اوږده او په هغه اړوند د دوی ایمان، وجدان او خیانت خو هېڅ د قضاوت وړ نه دی.
هسې خو هم دین، ایمان او رمضان د پټان په پچه ختلي او پنجابی دې سړیتوب ته د ټینګې نه دی.
له دې ټولو یوه خبره څرګندیږي چې د پنجابي ملا، ميا، پير او حضرت د اسلام د برحقه پیغام د خپرولو، د اسلام له دښمنانو سره د مبارزې او په پنجاب واکمنه پاکستان کې د اسلام د شرعي سیاست، سیادت او حاکمیت د خپرولو او ورته د کار کولو پر ځاى، دوی د اسلام د بدنامولو، تخریب او حتا تحریف ماموریت مخ ته وړي او د دوی ننوتل د پنجابي- فرنګي فیډریشن استخباراتي حمام ته له دوی څخه د دې ټولنې د عزت، شرف او دیني وراثت لباس ویستونکي رول لوبول غواړي.
پر همدې بنسټ، په افغان قضایاوو کې د پنجاب د پروتوکولي، درباري، استخباراتي او بدنامو ځیره خوارو په اصطلاح ملایانو دریځ که په هره بڼه او نیت وي؛ ناوړه، شریر او فاسد ګڼو، غندو یې او د امریکایي یرغل د مدافعینو پټه، سړه او څارګریزه وسله او وسیله یې ګڼو.
لیکنه: قاضي نجیب الله جامع
