د اذربایجان او ارمانیا ترمنځ تر شپږ اونۍ جګړې وروسته د سولې هوکړه لاسلیک شوه. د راپورونو له مخې ارمانیا خپله ماتې منلې ده او ژمنه یې کړې چې د ناګورنو قرباغ له نیول شوو سیمو به په راتلونکو لسو ورځو کې خپل ټول سرتېري وباسي. دغه هوکړه د روسیې په حضور کې لاسلیک شوې ده. د هوکړې له مخې ارمانیا به ټولې هغه سیمې پرېږدي چې له اذربایجان یې نیولې دي او په سیمه کې به تر دوه زره پورې روسي ځواکونه ځای پر ځای کېږي چې د اوربند ساتنه به کوي. د اذربایجان لوري ته به ترکي ځواکونه ځای پر ځای کېږي او دواړه لوري به د راتلونکو جګړو مخنیوی کوي. دواړو هېوادونو همدا راز توافق کړی دی چې د ازادانه تګ راتګ او جګړو د ختمولو لپاره به په راتلونکو کلونو کې په سیمه کې لویې لارې او سړکونه جوړوي او ارمانیا به بیا ځلې د اذربایجان پر خاوره له بریدونو ډډه کوي. همدا راز د کډوالو عالي کمیشنري به په سیمه کې د بېځایه شوو کسانو ستونزې حل کوي. د اذربایجان لومړي وزیر هم ویلي چې بالاخره ارمانیا خپله پړه او ماتې و منله او له سیمې په شا شوه.
