د ارزګان د د هراود ولسوالۍ امنیه قوماندان جان محمد کریمي وايي، چې یاده ولسوالۍ تېره شپه شاوخوا ۷ بجې د وسله والو طالبانو لاسونو ته لویدلې ده. نوموړی وايي، د ولسوالۍ ودانۍ، د قوماندانۍ ودانۍ او بازار د وسله والو طالبانو لاس ته لویدلي او افغان سرتېري یوازې پر کمپ واک لري. کریمي وايي، د مرګ ژوبلې په اړه معلومات نه لري، خو د ارزګان ولایت د والي ویاند احمد شاه ساحل بیا دا خبرې ردوي چې ګنې ولسوالۍ دې سقوط کړې وي. ساحل دا مني چې یو شمېر سیمې طالبانو نیولي خو وايي، افغان پوځيانو خپل عملیات پیل کړي دي.
