نیویارک ټایمز: ټرمپ پر ایران د پراخ پوځي برید چمتووالی نیسي

نیویارک ټایمز راپور ورکړی، چې ډونالډ ټرمپ خپلو سلاکارانو ته ویلي، که مذاکرات یا لومړنی هدفي برید ایران د امریکا غوښتنو منلو ته اړ نه‌کړي، نو په راتلونکو میاشتو کې به د ایران د مشرانو له واکه د لرې کولو په موخه پر دغه هېواد خورا لوی برید په پام کې ونیسي. دا په داسې حال کې ده، چې امریکا او ایران به د پنجشنبې په ورځ په جنیوا کې درېیم پړاو اټومي مذاکرات پیل کړي او داسې ښکاري، چې دا به پر ایران د پوځي اقدام د مخنیوي لپاره د مذاکراتو وروستی پړاو وي. خو نیویارک ټایمز په خپاره کړي راپور کې د امریکایي چارواکو له قوله ویلي، چې ټرمپ د مذاکراتو د ناکامۍ په صورت کې د ایران پروړاندې د اقداماتو پر انتخابونو غور کوي.