عراقچي؛ له امریکا سره د دریم پړاو مذاکراتو لپاره جینوا ته رسېدلی

تسنیم خبري اژانس راپور ورکړی، چې د ایران د بهرنیو چارو وزیر سیدعباس عراقچي له امریکا سره په درېیم پړاو اټومي مذاکراتو کې د ګډون موخه جینوا ته رسېدلی دی. ټاکل شوې چې دا پړاو مذاکرات نن د پنجشنبې په ورځ د عمان په منځګړیتوب پیل شي. د ایران د بهرنیو چارو وزیر سیدعباس عراقچي له دې وړاندې ویلي و چې ایران په جینوا کې له امریکا سره خبرې بیا پیلوي او موخه یې په لنډ وخت کې د عادلانه هوکړې ترلاسی دی. عراقچي ټينګار کړی چې هوکړه هغه مهال شونې ده چې ډيپلوماسي په لومړیتوب کې وي. دا په داسې حال کې ده چې د امریکا ولسمشر ډونالډ ټرمپ بیا کانګرس ته په خپلې کلنۍ وینا کې خبرداری ورکړی چې هېڅکله به هم اجازه ورنه کړي چې ایران اټومي وسلې ولري.