د پاکستان د بهرنیو چارو وزیر شاه محمود قریشي یو ځل بیا پر هند د ترهګرو د ملاتړ تور پورې کړی دی. قریشي ویلي، هند د ترهګرو لپاره روزنیز کمپونه جوړ کړي او هڅه کوي په پاکستان کې ګډوډۍ رامنځته کړي. هغه زیاته کړې، چې دوی ټول لیکلي او غږیز ثبوتونه نړۍ ته وړاندې کړي دي او له نړیوالې ټولنې یې غوښتنه کړې ده چې په دې اړه اړین اقدامات وکړي. هند د پاکستان دا تورونه رد کړي او ویلي یې دي چې پاکستان په دې ډول څرګندونو سره هڅه کوي د نړیوالو پام له ځانه بل لور ته واړوي. د یادونې ده چې پاکستان په دې وروستیو کې هم ورته تور لګولی وو او زیاته کړې یې وه چې هند افغان خاوره د پاکستان پر ضد کاروي او له تحریک طالبان پاکستان سره مالي مرسته کوي.
