مایک پمپیو نن په دوحه کې له مذاکراتي ټیمونو سره ګوري

د امریکا د بهرنیو چارو وزیر به په دوحه کې له مذاکراتي پلاوو سره ګوري. د رسنیو د راپورونو له مخې ټاکل شوې چې د امریکا د بهرنیو چارو وزیر مایک پمپیو دوحې ته لاړ شي او هلته به د قطر د بهرنیو چارو له وزیر سره ګوري. تر څنګ یې ټاکل شوې چې نن د دواړو مذاکراتي ټیمونو له غړو سره په جلا جلا توګه وګوري. فرانس پریس وايي چې مایک پمپیو به د سولې د روانې پروسې او ستونزو په اړه د افغان حکومت له مذاکراتي ټیم سره خبرې او بحثونه ولري. دا راپورونه داسې مهال خپرېږي چې ویل کېږي دواړه مذاکراتي ټیمونه پر ځینو مسایلو توافق ته رسېدلي او ژر به پر اجنډا بحثونه پيل شي. بلخوا په افغانستان کې هم جګړې شدیدې شوې، امریکا د خپلو سرتېرو ایستلو ته بېړنۍ ده او معلومه نه ده چې د طالبانو او افغان حکومت ترمنځ مذاکرات به څه وخت پایلې ته ورسېږي.