د چين دولت رئيس شي جين پينګ د اپرېل په ۲۰مه نېټه د سعودي عربستان له وليعهد محمد بن سلمان سره تليفونې خبرې کړې دي.
شي جين پينګ له سلمان سره په خبرو کې ويلي، چې هېواد يې له سعودي عربستان سره اړيکو ته په درنه سترګه ګوري او د متقابل درناوي، مساوي چلند او د ګډو ګټو پر اصولو ټينګار لري.
روان کال د دواړو هېوادونو ترمنځ د هراړخيزو ستراتيژيکو همکاریزو اړيکو د جوړېدو له لسمې کليزې سره برابر دی.
نوموړي ويلي، چين به له همدغه فرصت څخه په استفادې، له سعودي عربستان سره متقابلې ستراتيژيکې همکارۍ پياوړې کړي، د بېلا بېلو کچو تګ راتګ به ورسره پراخ او د خپلمنځي اړيکو پراخوالی او ژوروالی به زيات کړي او د چين او عربي هېوادونو ترمنځ د اړيکو په پرمختګ کې به نمونوي رول ولوبوي.
شي جين پينګ په منځني ختيځ کې د اوسنيو حالاتو په اړه ويلي، چې هېواد يې په سیمه کې سمدستي او هراړخيز اوربند غواړي او د سولې لپاره له هر ډول هڅو څخه ملاتړ کوي او پدې نظر دی، چې ښکېلې خواوې دې پر سياسي او ډيپلوماتيکو لارو ستونزې هوارې کړي.
نوموړي زياته کړې، هرمز تنګی بايد د عادي تګ راتګ لپاره پرانيستل شي او همدا د سيمې د هېوادونو او نړيوالې ټولنې له ګډو ګټو سره سمون لري.
محمد بن سلمان ويلي، د سعودي عربستان او چين ترمنځ اړيکې ستراتيژيک اهميت لري او له چين سره د اړيکو پرمختګ يې د سعودي عربستان لپاره ډېر مهم بللی دی.
نوموړي ويلي، په منځني ختيځ کې روانې جګړې د خليج هېوادونو امنيت زيانمن کړی او نړۍ ته د انرژۍ پر برابرول او اقتصاد یې منفي اغېزې کړې دي او په خبره یې، سعودي عربستان د خبرو له لارې د شخړې د حل لپاره هڅې کوي او د موضوعاتو د پراخوالي د مخنيوي هيله لري.
نوموړي ويلي، چين يو لوی مسئولانه هېواد دی او تل یې پر عادلانه دريځ ټينګار کړی او په منځني ختيځ کې يې د هېوادونو ترمنځ د دوستۍ او خبرو پلويتوب کړی دی او په وينا يې، سعودي عربستان به له چين سره همغږي پياوړې کړي، اوربند به وهڅوي او په هرمز تنګي کې د بيړيو خوندي او ازاد تګ راتګ به تامين کړي او د دايمي سولې لپاره به ګډه لاره ومومي.