د امریکا د ملي امنیت پخوانی سلاکار مک ماسټر چې افغانستان کې د ټرمپ سیاستونه په پرله پسې توګه نقد کوي تازه یې ویلي چې،داسې ښکاري چې د افغانستان په اړه د امریکا ټول پلانونه د دښمن په لاس کې وي. نوموړي ویلي د ټرمپ حکومت د افغانستان په اړه داسې اقدامات کوي چې هېڅ عقل ته د منلو نه دي او دا ټول د امریکا د ملي امنیت په زیان دي. هغه ویلي په داسې حال کې چې په افغانستان کې جګړه روانه ده، ترهګرې ډلې د پښې ځای پیدا کولو په لټه کې دي، افغان پوځ په یوازې ځان د جګړې وړتیا نه لري، خو د ټرمپ حکومت بیا هم د سرتېرو د ایستلو په لټه کې دی. هغه ویلي داسې ښکاري چې د افغانستان په اړه د ټرمپ پلانونه د امریکا د کوم دښمن له لوري طراحي کېږي او ټرمپ یې هم عملي کوي. هغه د ټرمپ پر حکومت دا نیوکه هم کړې، چې که یې سرتېري ایستل نو باید افغان حکومت یې نه وی اړ کړی چې طالب بندیان یې خوشي کړي وای ځکه په دې هر څه سره وضعیت تر پخوا خرابېدلی شي. هغه د امریکا پر راتلونکي ولسمشر جو بايډن غږ کړی چې د کار له پیل سره سم د ټرمپ پر پرېکړو بیا کتنه وکړي.
