هرات؛ د چودن توکو فابریکې د ۳۰۰ ډوله صنعتي پرزو تولید پیل کړی

په هرات ولایت کې د ماشین‌آلاتو او صنعتي پرزو جوړونې یوې فابریکې د یو میلیون ډالرو په پانګونې سره د شاوخوا ۳۰۰ ډوله بېلابېلو صنعتي پرزو او ماشین‌آلاتو تولید پیل کړی او بازار ته یې وړاندې کړي دي. د یادې فابریکې مسوولین وایي، په دې فابریکه کې شاوخوا ۷۰ تنه په دوو کاري شفټونو کې پر کار بوخت دي، چې ډېری یې له ایران او پاکستان څخه راستانه شوي هېوادوال دي. د مسوولینو په وینا، د دغو تولیداتو لپاره اړین خام مواد له کورنیو سرچینو برابرېږي، چې له امله یې د ورته وارداتي پرزو اړتیا هم کمه شوې ده. مسوولین زیاتوي، چې د دوی تولیدات صنعتي پرزې، ماشین‌آلات او د بېلابېلو برخو اړین تجهیزات رانغاړي او هڅه کوي په راتلونکي کې د خپلو تولیداتو کچه لا پراخه کړي.