د امریکا د بهرنیو چارو وزیر مارکو روبیو ویلي، واشنګټن لا هم هڅه کوي چې له ایران سره روان کړکېچ د ډیپلوماټیکو لارو هوار کړي، خو ټینګار یې کړی چې ایران باید هېڅکله اټومي وسلو ته لاسرسی ونه لري. فاکس نیوز په خپاره کړي راپور کې د روبیو له قوله ویلي، چې له تهران سره روانې خبرې مثبت پرمختګ لري او ښايي په راتلونکو ورځو کې نوي بدلونونه هم رامنځته شي. روبیو زیاته کړې، د امریکا ولسمشر ډونالډ ټرمپ غواړي اختلافات د خبرو او مذاکراتو له لارې حل شي، خو واشنګټن په خپلو مشخصو غوښتنو ټینګ ولاړ دی. د نوموړي په وینا، له ایرانه غوښتل شوي چې خپل بډایه شوي یورانیم وسپاري او د یورانیمو د بډاینې اړوند پروګرامونه ودروي. دا څرګندونې داسې مهال کېږي چې تر دې وړاندې ډونالډ ټرمپ هم له ایران سره په روانو مذاکراتو کې د پرمختګ خبر ورکړی و.
