د چين دولت رئيس شي جين پينګ د مې په ۲۵مه نېټه د بېجينګ د خلکو په لوی تالار کې د پاکستان له صدراعظم شهباز شريف سره لیدلي او پر دوه اړخيزو اړيکو يې ورسره خبرې کړې دي.
شي جين پينګ په دې ليدنه کې ويلي، چې چين او پاکستان د خپلمنځي رسمي اړيکو د ټينګېدو له ۷۵ کلونو راهيسې د متقابل تفاهم، متقابل باور او متقابل ملاتړ په رڼا کې ټينګه او نه ماتېدونکې دوستي ټينګه کړې او د دوه اړخيز ستراتيژيک باور او ګټورې همکارۍ له لارې یې پرمختګ موندلی دی. چين به د نړيوال وضعيت د بدلونونو پر وړاندې په ګاونډيو ډيپلوماتيکو چارو کې له پاکستان سره د اړيکو پر لومړيتوب ټينګار وکړي.
شي جين پينګ په ټينګه ويلي، چې چين د خپلواکۍ، ملي حاکميت او ځمکنۍ بشپړتيا د ساتنې په برخو کې د پاکستان د هڅو ټينګ ملاتړ کوي او له پاکستان سره به د لوړ پوړو چارواکو د تګ راتګ لړۍ جاري وساتي، ستراتيژيکې تبادلې به پياوړې کړي او د دوه اړخيزو اړيکو د پرمختګ سم لوری به ډاډمن کړي.
شي جين پينګ زياته کړې، چې دواړه خواوې بايد د چين او پاکستان د ګډ برخليک ټولنې د ابادۍ عملي پلان تطبیق کړي، مهمې نمونوي پروژې او د خلکو د ژوند لپاره ګټورې او کوچنۍ پروژې دې ښې ترسره کړي او د کرنې، صنعتي چارو، مصنوعي ځيرکتيا او انساني روزنې په برخو کې دې هر اړخيزې همکارۍ زياتې کړي. دواړه خواوې بايد د لا لوړې کچې او لا زياتو برخو امنيتي همکارۍ وکړي او د سيمه ييزې سولې او ثبات د خونديتوب لپاره دې ګډې هڅې وکړي.
شي جين پينګ د منځني ختيځ د سولې لپاره د پاکستان منځګړيتوب ستايلی او ويلي يې دي، چې دواړه خواوې بايد د يو اړخيزم او سړې جګړې له افکارو سره مبارزه کې نژدې اړيکو او همغږۍ ته دوام ورکړي او په ګډه دې د نړۍ د څو قطبي کېدو د منظم او برابر جريان او د اقتصاد د نړيوال کېدو جريان ته وده ورکړي.
شهباز د يو چين پېژندنې پر اصل د ټينګار کولو دريځ څرګند کړی او ويلي يې دي، چې هېواد يې د چين د اصلي ګټو په چارو کې د چين د دريځ ټينګ ملاتړ کوي او تل به د چين ښه ملګری او همکار وي. نوموړي د ايران او امريکا ترمنځ د منځګړيتوب لپاره د چين له ملاتړ څخه مننه کړې او د منځني ختيځ د وضعيت په اړه يې د رئيس شي جين پينګ ۴ فقره ييز وړانديز د سولې د رامنځته کولو لارښوونکی پلان بللی.