د چين مرستيال دولت رئيس هان جنګ د جون په ۵مه نېټه د روسيې په سن پيټرسبورګ کې د دې هېواد له ولسمشر ولاديمير پوتين سره رسمي لیدنه کړې ده.
هان جنګ په دې ليدنه کې نوموړي ته د چین دولت رئيس شي جين پينګ نېکې هيلې او پېرزوینې وړاندې کړې او ويلي يې دي، چې د چين او روسيې ترمنځ اړيکې د رئيس شي جين پينګ او ولسمشر پوتين د لارښوونې په رڼا کې په پېچلي نړيوال وضعيت کې ثابتې پاتې شوې دي. څه موده مخکې د دواړو هېوادونو مشرانو په بېجينګ کې بريالۍ ليدنه تر سره کړې او د دوه اړخیزو اړيکو او په بېلابېلو برخو کې د همکاريو د جوړولو په اړه يې نوې ګډه موافقه جوړه کړې ده. د هغه په وينا، هېواد به يې له روسيې سره ياده ګډه موافقه ښه پلي کړي، په دوامدار ډول به متقابل سياسي اعتماد لا نور ټينګ کړي، خپلمنځي همکارۍ به زياتې کړې، نړيواله همغږي به لا نوره ژوره کړي او د دواړو هېوادونو اړيکو ته به مثبته وده ورکړي.
پوتين په دې ليدنه کې له هان جنګ غوښتي، چې رئیس شي جين پينګ ته د ده سلامونه او نېکې هيلې ورسوي. هغه د سن پيټرسبورګ د نړيوال اقتصاد په ۲۹م فورم کې د هان جنګ د ګډون هرکلی څرګند کړی او ویلي يې دي، چې د روسيې او چين ترمنځ اړيکې په بې ساري توګه لوړې شوې دي. د هغه په وينا، څه موده مخکې يې له رئيس شي جين پينګ سره د پراخو موضوعاتو په اړه د نظريو ژوره تبادله تر سره کړې او په راتلونکي کې د دواړو خواوو د همکارۍ تمايل يې تایید کړی دی. سږکال به چيني او روسي لوري د روسيې او چين د دوستانه همکارۍ تړون د لاسليک ۲۵مه کليزه ونمانځي او د روسيې او چين د تعليمي کال فعاليت به پيل کړي. هغه څرګنده کړې، چې هېواد به يې له چين سره يو ځای متقابل سياسي اعتماد او خپلمنځي دوستي لا نوره ژوره کړي، په بېلابېلو برخو کې تبادله او همکارۍ به زياتې کړي، څو د روسيې او چین ترمنځ اړيکې ثابتې او دوامداره پاتې شي او په دې سره به د نړۍ سولې او پرمختګ ته ثابته وده ورکړي.