د چين د کمونېست ګوند د مرکزي کمېټې عمومي منشي او دولت رئيس شي جين پینګ له ډيموکراتيکې کوریا څخه د رسمي ليدنې په درشل کې د دغه هېواد په رودونګ شينمون ورځپاڼې کې «د ستونزو په لرې کولو سره د لا روښانه راتلونکي د برابرولو او د چين او ډيموکراتيکې کوريا د عنعنوي دوستۍ لا تينګښت» په سرليک يوه لیکنه خپره کړې ده.
نوموړي په دغې لیکنې کې د چين او ډيموکراتيکې کوريا عنعنوي دوستۍ ته کتنه کړې او پکې يې ويلي، چې دواړو هېوادونو د اړيکو د پرمختګ تجربې راټولې او د ستراتيژۍ له مخې يې اړيکې ټينګې کړي او د زمانې له پرمختګ سره سم يې د دوه اړخيزو اړيکو لا پرمختګ ته روښانه لاره برابره کړې ده.
که تاريخ ته کتنه وشي، نو چين او ډيموکراتيکې کوريا هر وخت په ګډه ستونزې لرې کړي او خپلمنځی دوستي يې ښکاره کړې ده.
چين او ډيموکراتيکه کوريا ګډ برخليک لرونکي سوسیاليستي ګاونډيان دي، هر وخت یې يو له بل سره مرستې کړي او دودیزه دوستي يې د دواړو هېوادونو، ګوندونو او خلکو ګډه قيمتي شتمني بلل کېږي.
شي جين پينګ په دغې لیکنې ويلي، که وخت او نړيوال وضعيت هر څنګه بدلېږي، د چين او ډيموکراتيکې کوريا دوستي به ټینګه او له حياتي ځواک څخه به ډکه وي.
روان کال د چين او ډيموکراتيکې کوريا ترمنځ د ډيپلوماتيکو اړيکو د ټينګېدو او هم د دواړو هېوادونو ترمنځ د دوستانه همکاريو او مرستو د تړون د لاسليک له ۶۵ کاليزې سره برابر دی.
د دواړو هېوادونو د اړيکو پرمختیايي جريان ته په کتو، عمومي منشي شي جين پینګ په يادې لیکنې کې د مشرانو ستراتيژيکه لارښوونه د چين او ډيموکراتيکې کوریا تر ټولو لوی غوره والی، ګډ سوسيالیستي ارمان د دواړو هېوادونو د اړيکو څرګنده ځانګړتيا او ګډ برخليک لرونکې عنعنوي دوستي د دغو اړيکو ژور بنسټ او د لوړې سويې ستراتيژیکې همکارۍ د دې اړيکو د زمانې محتوا بللې ده.
دغه څلورټکي د چين او ډيموکراتيکې کوريا د اړيکو د تاریخي پرمختیايي تجربو لنډيز او د دغې عنعنوي دوستۍ د لا ټينګښت لپاره يو مهم اصل بلل کېږي.
يو چینايي متل چې وايي: خپلوان او ګاونډيان تل هيلې لري، چې نور خپلوان او ګاونډيان یې نيکمرغه ژوند ولري. که په نړيوال وضعيت کې هر څنګه بدلون راځي، د چین او ډيموکراتيکې کوريا د اړيکو ښه ساتنه، ټينګښت او پرمختګ به د چين د کمونېست ګوند او حکومت نه بدلېدونکې تګلاره وي.
د چين د کمونېست ګوند د مرکزي کمېټې د عمومي منشي شي جين پینګ او د ډيموکراتيکې کوريا د کارګرو ګوند د عمومي منشي کين جون ون تر ستراتيژيکې لارښوونې لاندې د دواړو هېوادونو ترمنځ عنعنوي دوستانه همکاريزو اړيکو سالم او ثابت پرمختګ موندلی او د دواړو هېوادونو او خلکو ته یې ګټې رسولې دي.
نړۍ په تېرو سلو کلونو کې ډېرې ژورې تجربه کړي او اوس هم په نړيوال وضعيت کې ډېر لوی بدلونونه روان دي. چين او ډيموکراتيکه کوريا د نړۍ د حالاتو پر وړاندې پر خپلو چارو تمرکز لري او په سوسیالیستي لوري نه ستومانه کېدونکي کوششونه کوي.
چين د پنځلسم پنځه کلن پلان د تطبیق چارې او د چيني شکله عصريتوب د نوي پرمختګ او د دويمې سل کلنې موخې لپاره یې هڅې پيل کړې دي. د دې ترڅنګ د ډيموکراتيکې کوريا د کارګرو ګوند په بريالیتوب سره د دې ګوند نهم ملي کانګرېس ترسره کړی او پکې يې د ګوند او دولتي چارو د پرمختګ په اړه ستراتيژيک پلان جوړ او ترتيب کړی او د سوسياليزم د هر اړخيز پرمختګ نوی پړاو يې پيل کړی دی.
د چین او ډيموکراتيکې کوريا ترمنځ اړيکې په نوې تاريخې پيل کې له نويو پرمختیایي فرصتونو او د زمانې له نوې دندې سره مخ دي.
که دواړه هېوادونه د زمانې له پرمختګ سره سم دغو اړيکو ته نوی پرمختګ ورکړي، نو بايد ستراتيژیکې تبادلې لاپیاوړې او د دغو اړيکو سم پرمختيايي لوری خپل کړي.
د چین او ډيموکراتيکې کوريا د دوستۍ په سندره کې ويل شوي: مونږ پراخه دوستي او ګډ ارمان لرو او د يووالي په برخه کې ځواکمن يو.
که په نړۍ کې هر څنګه بدلون راځي، چين او ډيموکراتيکه کوریا به خپله دوستي پالي او دوام به ورکوي.
چين او ډيموکراتيکه کوريا به د رئيس شي جين پینګ له دې سفر څخه په استفادې د سيمې او نړۍ د سولې، ثبات، پرمختګ او سمسورتيا د پرمخبېولو لپاره لازيات خدمتونه وکړي.