د چین او جنوبي اسیا لسم نندارتون د جون له ۱۱مې نېټې څخه تر ۱۶مې نېټې پورې د چین د یون نان ولایت په کون مینګ ښار کې ترسره شو.
د چین دولت رئیس شي جين پينګ دغه نندارتون ته د مبارکۍ پيغام لېږلی او پکې يې لیکلي، چې هېواد به یې له بېلا بېلو هېوادونو سره د چین او جنوبي اسیا نندارتون په ډګر کې ګډ پرمختګ، يووالی او همکارۍ وهڅوي، همکاريو ته به دوامداره وده ورکړي، د کمربند او لارې باکیفیته پرمختګ به وهڅوي، د نړیوال پرمختګ نوښت د پلي کولو لپاره به کار وکړي او په ګډه به یو سوکاله او ښکلی راتلونکی رامنځته کړي.
چین او د جنوبي اسیا هېوادونه په جغرافیایي لحاظ نږدې دي او له زرګونو کالونو راهیسې سوداګري او کلتوري تبادلې لري.
یون نان ولایت ځانګړې جغرافیایې بڼې لري او له اوږدې مودې راهیسې جنوبي او جنوب ختیځې اسیا ته د چین مهمه دروازه ده.
په ۲۰۰۷م کال کې، د چین په پلازمېنې بېجینګ کې د جنوبي اسیا هېوادونو د توکو نندارتون ترسره شو او چیني بازار ته د جنوبي اسیا د ځانګړو محصولاتو د ننوتلو کړکۍ پرانیستل شوه.
له ۲۰۰۹م کال راهیسې، په کون مینګ ښار کې د جنوبي اسیا هېوادونو د توکو نندارتون ترسره کېږي. دغه نندارتون د یونان جغرافیایي غوره والی رابرسېره کړی او هم جنوبي اسیا ته نږدې دی.
د اقتصاد د نړیوال کېدو او سیمه ییز ادغام برتريو او رجحاناتو ته په کتو، د چین دولتي شورا په ۲۰۱۲م کال کې د جنوبي اسیا د هېوادونو د توکو نندارتون د چین او جنوبي اسیا نندارتون نوم ته واړوه.
دغه نندارتون اوس په کونګ مینګ ښار کې موقعیت لري او هملته ترسره کېږي.
دغه نندارتون د چین د سوداګرۍ وزارت او د یون نان ولایتي حکومت لخوا په ګډه جوړېږي او د کمربند او لارې د ګډې ابادۍ لپاره یو مهم ډګر او جنوبي او جنوب ختیځې اسیا ته د چین د ورخلاصون ستراتیژیک مرکز بلل کېږي.
د چین او جنوبي اسیا لومړی نندارتون په ۲۰۱۳م کال کې “د چین او جنوبي اسیا ترمنځ جامع همکارۍ او پرمختګ ته وده ورکول” په سرليک ترسره شو، چې پکې ۴۲ هېوادونو او سیمو ګډون کړی و او د چین او جنوبي اسیا هېوادونو ترمنځ د متقابلو ګټو د همکاريو یو نوی څپرکی يې پرانېست.
د چین او جنوبي اسیا هر نندارتون د جنوبي او جنوب ختیځې اسیا د هېوادونو زرګونه تصدۍ راجلبوي او د سیمه ییزې همکارۍ په وده کې مهم رول لوبوي.
په کون مینګ کې د بنګلادېش د کونسلګرۍ عمومي سوداګریز کونسل رشید رسنيو ته ويلي، چین د جنوبي اسیا لپاره یو لوی بازار او د بنګلادېش تر ټولو لوی سوداګریز همکار دی.
نوموړي هيله ښودلې، چې دواړه هېوادونه متقابلو ګټو او اقتصادي او سوداګریزو همکاریو ته وده ورکړي او خپل صادرات پراخ کړي.
د سریلانکا د سوداګرۍ، خوراکي امنیت او همکارۍ پرمختګ وزیر واسنتا سماراسینګ رسنيو ته ويلي، چین نړیوال اقتصاد ته دوامدار ثبات او ډاډمنتیا برابره کړې او په نړۍ کې بل هېواد د چین په څېر جنوبي اسیا ته ډېر مهم پراختیایي فرصتونه نه دي برابر کړي.
