بلومبرګ خبري شبکې راپور ورکړی چې د امریکا او ایران د تفاهمنامې په مسوده کې ایران ته د پام وړ مالي امتیازات په پام کې نیول شوي، چې د نفتو د صادراتو زیاتوالی، مالي سرچینو ته لاسرسی او د کنګل شویو شتمنیو ازادول په کې شامل دي. د راپور له مخې، متحده ایالات به د هوکړې له لاسلیک وروسته سمدستي معافیتونه صادر کړي، څو ایران وکولای شي خپل خام نفت او پتروکیمیاوي محصولات نړیوالو بازارونو ته صادر کړي. بلومبرګ زیاته کړې چې د هرمز تنګي له لارې د کښتیو د تګ راتګ د عادي کېدو لپاره به هم عملي ګامونه واخیستل شي او تمه ده دا بهیر په ۳۰ ورځو کې بشپړ شي.راپور همداراز د لږ تر لږه ۳۰۰ میلیارد ډالرو په ارزښت د یوه پراختیایي بنډل یادونه کوي، چې د امریکا او سیمهییزو شریکانو په همکارۍ به طرحه شي، خو د دې پروګرام د پلي کېدو څرنګوالی او مهالوېش لا نه دی اعلان شوی.
