ډبلیو ایف پي: افغانستان کې ۳.۷ میلیونه ماشومان د شدیدې خوارځواکۍ له ګواښ سره مخ دي

د خوړو نړیوال پروګرام(ډبلیو ایف پي) ویلي، د وړاندوینو له مخې به په افغانستان کې نږدې ۳.۷ میلیونه ماشومان پر شدیدې خوارځواکۍ اخته شي. یاد بنسټ راپور ورکړی چې پر ماشومانو سربېره، شاوخوا ۱.۲ میلیونه شیدې ورکوونکې او امیندواره ښځې هم د خوارځواکۍ له ګواښ سره مخ دي. په افغانستان کې د خوړو نړیوال پروګرام مشر، جان ایلیف ویلي، افغانستان په نړۍ کې د خوارځواکۍ له سخت او دوامداره ناورین سره مخ دی او ښايي اوسنۍ شمېرې له پخوانیو وړاندوینو هم لوړې شي. نوموړي خبرداری ورکړی چې د دغه وضعیت دوام به ډېر ماشومان او میندې د مخنیوي وړ مړینو له ګواښ سره مخ کړي. د خوړو نړیوال پروګرام ټینګار کړی چې د خوارځواکۍ د درملنې خدماتو پراخول د دې بشري ناورین د لا پراخېدو د مخنیوي لپاره اړین دي.